აზიის თასზე მეოთხედფინალური ეტაპი დაიწყო და ორი ნახევარფინალისტი გაირკვა. სამხრეთ კორეამ ავსტრალია დამატებით დროში დაამარცხა.

იურგენ კლინსმანის გუნდი მერვედფინალში საუდის არაბეთთან მარცხს 99-ე წუთზე გატანილი გოლით გადაურჩა, მერე პენალტებში იმარჯვა და მომდევნო ეტაპზე გავიდა. ბედად, ახლაც იგივე მოხდა.

ავსტრალიის ნაკრები 42-ე წუთზე გუდვინმა დააწინაურა და ძალიან ახლოს იყო ნახევარფინალთან, მაგრამ ამჯერად 96-ე წუთზე ჰვან ჰი-ჩანმა პენალტით გაათანაბრა და პრაქტიკულად წაგებული თამაში დამატებით დროში გადაიყვანა. იქ კი, 104-ე წუთზე ჰონ მინ-სონმა გამარჯვების გოლი გაიტანა. ამრიგად, ზედიზედ მეორედ სამხრეთ კორეამ დრამატულ ბრძოლაში მოიგო და მომდევნო ეტაპზეა.

ნახევარფინალში გავიდა იორდანიის ნაკრებიც, რომელმაც ტურნირის აღმოჩენა ტაჯიკეთი 1:0 დაამარცხა. მოგეხსენებათ, ტაჯიკეთის ნაკრებს საქართველოს ეროვნული და 21-წლამდე ნაკრების ყოფილი მწვრთნელი, პეტარ სეგრტი ავარჯიშებს, მისი ასისტენტები კი გელა შეყილაძე და თაზო ბოკერია არიან. ტაჯიკეთმა საბოლოოდ, ასპარეზობა მეოთხედფინალში დაასრულა.

ნახევარფინალში 6 თებერვალს იორდანია და სამხრეთ კორეა შეხვდებიან, იქამდე ხვალ ორი მეოთხედფინალია: ირანი - იაპონია და კატარი - უზბეკეთი.