„მონცას“ მთავარმა მწვრთნელმა რაფაელე პალადინომ „ნაპოლისთან“ მატჩის წინ პრესკონფერენცია გამართა. როგორც მან თქვა, მეტოქე ძალიან ძლიერია, მაგრამ ეცდებიან პრობლემები შეუქმნან და დადებით შედეგს მიაღწიონ.

„არ ვიცოდი, რომ სერია A-ში 50-ე თამაში მქონდა, ეს დიდი კმაყოფილებაა. გვინდა კარგად ვითამაშოთ, რადგან იტალიის ჩემპიონს ვხვდებით, რომელსაც შესანიშნავი ფეხბურთელები ჰყავს. ამ კვირაში კარგად ვიმუშავეთ და გვინდა დადებით შედეგს მივაღწიოთ.

„ნაპოლის“ ფეხბურთელის რანგში არაერთხელ შევხვდი, მაგრამ მწვრთნელის რანგში „მარადონაზე“ პირველად ვიქნები და ეს განსხვავებული ემოციაა. ნეაპოლის შვილი ვარ, იქ დავიბადე, ჩემი ოჯახი და მეგობრები იქ ცხოვრობენ. მიუხედავად იმისა, რომ დიდი ხანია წამოსული ვარ, ჩემი გული იქაა და დაბრუნება დიდი ემოციაა.

„ნაპოლის“ რამდენიმე ტრავმირებული ჰყავს, მაგრამ ისინი იტალიის ჩემპიონები და ყოველთვის ძლიერები არიან. თუმცა, ვეცდებით, ჩვენი იარაღით და მენტალიტეტით პრობლემები შევუქმნათ, რადგან ქულები გვჭირდება“, - აღნიშნა პალადინომ.

შეგახსენებთ, რომ „ნაპოლის“ და „მონცას“ მატჩი 29 დეკემბერს, თბილისის დროით 21:30 საათზე გაიმართება.