რუსთაველთა 4-მატჩიანი წარუმატებელი სერია დასრულდა. ანატოლი ბოისას გაწვრთნილმა ქვემო ქართლის გუნდმა 85:79 (სტატისტიკა) დაამარცხა “კავკასია” და საკუთარი გულშემატკივარი, როგორც იქნა, გამარჯვებით გაახარა.

რუსთავში სათამაშოდ ჩასულმა კავკასიამ კი პირიქით – სამმატჩიანი წარმატებული სერია შეწყვიტა. სეზონის 3 წაგებით დაწყების შემდეგ კავკასიამ მოგებებს უხშირა და სატურნირო მდგომარეობა გაიუმჯობესა. ბექა წივწივაძის გუნდი რუსთავში მოგებ-წაგებების თანაბარი რაოდენობით (4-4) ჩავიდა, მასპინძლებს კი 3 მოგების წილ 5 მარცხი ჰქონდათ. ერთი სიტყვით, გუნდები ცხრილში ახლოს იყვნენ და მოგება ორივეს ჰაერივით ესაჭიროებოდა.

ბრძოლაც შესაბამისად უშეღავათო გაჩაღდა. კავკასიას აკლდა ერთ-ერთი ლიდერი ნიკოლოზ გაფრინდაშვილი, რომელმაც წინა მატჩში დისკვალიფიკაცია მიიღო და სანქციად ერთი მატჩის გამოტოვება დაუწესდა. თავის მხრივ, რუსთაველებსაც არანაკლები დანაკლისი ჰქონდათ: ჯორდან ჰენდერსონი.

კავკასიელები ტოლს არაფერში უდებდნენ მეტოქეს და პირველი მეოთხედი 26:22 მოიგეს. მეორიდან კი მასპინძლებმა მეტოქის დაცვას გასაღები მოარგეს, ლიდერობა მოიპოვეს და დიდ შესვენებამდე 3-ქულიანი უპირატესობა მოიპოვეს – 42:39.

მესამე პერიოდი კავკასიელებმა ზუსტად 3 ქულით მოიგეს და ბოლო პერიოდიდან, ფრე ანგარიშით ყველაფერი თავიდან დაიწყო. დასკვნით ათწუთეულში მასპინძლებმა მეტოქე გატეხეს, რაც, ცხადია, გუნდური ძალისხმევით განხორციელდა, თუმცა აღსანიშნავია ანზორ ნადირაძის უხვქულიანობა, რომელმაც საკვანძო ეპიზოდში 7 ქულა ჩააგდო. მას შეეშველა ლუკა ბულაშვილი, ლევან ბაბილოძეც და მასპინძელთა ლიდერობამ მატჩის დასრულებამდე 5 წუთით ადრე 10 ქულას გადააჭარბა.

მატჩი ისე დასრულდა, ვითარება აღარ დაძაბულა. რუსთავმა გაიმარჯვა და მოგებ-წაგებებით კავკასიას გაუთანაბრდა. გამარჯვებაში ლომის წილი ბულაშვილმა დაიდო, რომელმაც 29 ქულა, 6 მოხსნა დ 5 პასი მოაგროვა. 15 ქულა ჩააგდო ლევან ბაბილოძემ, ანზორ ნადირაძემ და თაჯეი თიგმა 14-14 ქულა მიითვალეს. კავკასიელთაგან ყველაზე მეტი – 14 ქულა ლევან გოგიჩაიშვილმა მოაგროვა. 10 ქულა და 8 მოხსნა ჯეილენ სმიტის ანგარიშზეა.

სუერლიგის მე-10 ტურის 3 შეხვედრა ხვალ, 16 დეკემბერს, ოლიმპიურ სასახლეში გაიმართება.

GBF.GE