ძიუდოს ჩემპიონთა ლიგაზე ქართულმა კლუბებმა წარუმატებლად იასპარეზეს. „გოლდენ გორი“ და შარშანდელი ჩემპიონი „მებრძოლი“ პირველივე წრეში დამარცხდნენ, შესაბამისად, „ბეოგრადთან“ (2:3) და „არისთან“ (1:3).

„მებრძოლი“ რეპეშაჟში „სტაბიასთანაც“ დამარცხდა (1:3), შედეგად უმედლოდ დარჩა, ხოლო „გოლდენ გორმა“ ჯერ „პარტიზანს“ მოუგო 3:0 და მერე ფრანგულ „სატრუვილს“ ამავე ანგარიშით და ბრინჯაოს მედლისთვის ბრძოლის უფლება მოიპოვა.

ქართულ გუნდს „პარი სენ-ჟერმენთან“ დაპირისპირება მოუწია და ფრანგულმა კლუბმა 3:2 გაიმარჯვა. აღსანიშნავია, რომ პარიზელთა რიგებში ლაშა ბექაურმა გიორგი დვალაშვილი დაამარცხა, ხოლო ტატო გრიგალაშვილმა ვლადიმერ ახალკაცი.