ჩემპიონთა ლიგას კიდევ ორი მერვედფინალისტი შეემატა - ლონდონის „არსენალი“ და პსვ ეინდჰოვენი. აღსანიშნავია, რომ ორივე გუნდი პლეი-ოფში დიდი ხნის შემდეგ გავიდა.

A ჯგუფი

ამ ჯგუფში „მანჩესტერმა“ „გალათასარაისთან“ დღის პირველ მატჩში ორჯერ გაანიავა ორბურთიანი უპირატესობა, ხოლო უმოტივაციო „ბაიერნმა“ შინ „კოპენჰაგენს“ ვერ მოუგო - 0:0.

„ბაიერნი“ პირველ ადგილზე 13 ქულით უკვე გასულია, ხოლო მეორე ადგილისთვის დიდი ბრძოლაა: „გალათასარაის“ და „კოპენჰაგენს“ 5-5 ქულა აქვთ, ხოლო „მანჩესტერს“ – 4. ასე რომ, ბოლო ტურში „კოპენჰაგენი“ – „გალათასარაი“ და „მანჩესტერი“ – „ბაიერნის“ მატჩები ყველაფერს გაარკვევს.

„ბაიერნი“ – „კოპენჰაგენი“ 0:0 (0:0)

B ჯგუფი

პსვ ეინდჰოვენმა დღის საწყის შეხვედრაში „სევილიას“ სტუმრად 0:2-დან 3:2 აჯობა და უმნიშვნელოვანესი გამარჯვება მოიპოვა. ლონდონის „არსენალმა“ კი ფრანგული „ლანსი“ 6:0 გაანადგურა.

„არსენალმა“ 12 ქულით არამარტო მერვედფინალის საგზური, არამედ პირველი ადგილიც გაინაღდა. პსვ-ს 8 ქულა აქვს და ჯგუფიდან უკვე გავიდა. ბოლო ტურში „ლანსი“ – „სევილიას“ მატჩი გაარკვევს ევროპა ლიგის საგზურის ბედს, ფრანგებს ქულაც ეყოფათ.

„არსენალი“ – „ლანსი“ 6:0 (5:0)

გოლები: 1:0 ჰავერტცი (13), 2:0 გაბრიელ ჟეზუში (21), 3:0 საკა (23), 4:0 გაბრიელ მარტინელი (27), 5:0 ოდეგორი (45), 6:0 ჟორჟინიო (86, პენ)

D ჯგუფი

ამ ჯგუფში წინა ტურში გადაწყდა, რომ „სოსიედადი“ და „ინტერი“ მერვედფინალში ითამაშებდნენ. ამიტომაც, ამჯერად გადახალისებული შემადგენლობებით ითამაშეს.

„სოსიედადი“ შინ „ზალცბურგს“ დაუზავდა, ხოლო „ინტერი“ პირველი ტაიმის მერე „ბენფიკასთან“ 0:3 მარცხდებოდა, სხვათა შორის, იტალიური გუნდის ყოფილმა ფეხბურთელმა ჟოაო მარიომ ჰეთ-თრიქი შეასრულა. მეორე ნახევარში სიმონე ინძაგის გუნდმა 3 გოლი გაიტანა და ქულა მაინც მოიპოვა.

ბოლო ტურში „ინტერი“ – „სოსიედადის“ მატჩი პირველი ადგილის ბედს გაარკვევს, „ზალცბურგი“ – „ბენფიკას“ დაპირისპირება ევროპა ლიგის ბედს.

„ბენფიკა“ – „ინტერი“ 3:3 (3:0)

გოლები: 1:0 ჟოაო მარიო (5), 2:0 ჟოაო მარიო (13), 3:0 ჟოაო მარიო (34), 3:1 არნაუტოვიჩი (51), 3:2 ფრატეზი (58), 3:3 სანჩესი (72)

„სოსიედადი“ – „ზალცბურგი“ 0:0 (0:0)