იტალიის ნაკრების ყოფილმა თავდამსხმელმა, მარიო ბალოტელიმ, ევრო 2024-ის საკვალიფიკაციო ეტაპის ბოლო ტურის მატჩში უკრაინელი თავდამსხმელის, მიხაილო მუდრიკის წაქცევისთვის 93-ე წუთზე არდანიშნულ პენალტზე ისაუბრა. შეხვედრა ანგარიშით 0:0 დასრულდა.

„ეს ნამდვილად პენალტი იყო. ევროპის ჩემპიონატზე მივდივართ, მაგრამ ერთ რამეზე ვიფიქროთ: პირიქით რომ მომხდარიყო, რა რეაქცია გვექნებოდა? იმ ეპიზოდში მუდრიკმა გაასწრო კრისტანტეს და მას ეუხეშნენ, ამაში ეჭვი არ მეპარება, ასეთი პენალტი ჩემთვის რომ არ დაენიშნათ, გავგიჟდებოდი“, - ციტირებს ბალოტელის სიტყვებს Tuttomercatoweb.

იტალიის ნაკრებმა ჯგუფში მეორე ადგილი დაიკავა და ტურნირის ფინალურ ეტაპზე გავიდა. უკრაინის ნაკრებმა, თავის მხრივ, მესამე ადგილი დაიკავა და ევრო 2024-ის საგზურის მოპოვებას ერთა ლიგის ფლეი-ოფში ეცდება.