თბილისის საკრებულოში ცნობილი ქართველი ფოტოგრაფის ბადრი კეთილაძისადმი მიძღვნილი წიგნის პრეზენტაცია გაიმართა.

საქართველოს დამოუკიდებლობის წლებში თუკი ვინმეს სპორტულ ჟურნალისტიკასთან გარკვეული შეხება მაინც ჰქონია, ბადრი კეთილაძის სახელი, იშვიათი გამონაკლისის გარდა, ყველამ იცის. სხვაგვარად ვერც იქნებოდა, რადგან ათწლეულების განმავლობაში სხვადასხვა სპორტულ ღონისძიებებზე მის მიერ გადაღებული ფოტოები პრაქტიკულად ყოველთვის იწვევდა აღფრთოვანებას და უამრავი (დიახ, უამრავი და არა, დავუშვათ რამდენიმე ათეული) მისი ფოტო განსაკუთრებულ მოწონებას და მსჯელობას იმსახურებდა.

ძალიან დასანანია, რომ სრულიად განსაკუთრებული ხედვის მქონე ბადრის დიდ საერთაშორისო სპორტულ ფორუმებზე მუშაობისა და საკუთარი ნიჭის გამოვლენის საშუალება არ მიეცა. ადვილი წარმოსადგენია, რა საოცარ ფოტოებს გვაჩუქებდა ოლიმპიადებიდან თუ მსოფლიო ჩემპიონატებიდან.

სასწაული ფოტოების გარდა, ბადრის განსაკუთრებულმა ნიჭმა კიდევ ერთი, არანაკლებ მნიშვნელოვანი და დიდი შედეგი მოგვცა - მის მიერ დამოძღვრილი, დაკვალიანებული და დასაქმებული ახალგაზრდა ფოტოგრაფები დღეს არამარტო ქართული, არამედ მსოფლიო მასშტაბით აოცებენ ადამიანებს.

სწორედ ამ ახალგაზრდა, მაგრამ უკვე ძალიან ცნობილმა და გამოცდილმა ფოტოგრაფებმა, ბადრის სხვა, ძალიან ახლობელ კოლეგა-მეგობრებთან და ოჯახის წევრებთან ერთად, ითავეს წიგნის გამოცემისა და პრეზენტაციის ორგანიზება.

წიგნში ასახულია ბადრი კეთილაძის მიერ 1996-2002 წლებში გადაღებული ფოტოების მცირე ნაწილი. ისე კი, ბადრი კეთილაძეს 1992 წლიდან მოყოლებული 2020-იანების დასაწყისის ჩათვლით, უმუშავია შემდეგ გამოცემებში: "ქუთაისი", "ახალი ქუთაისი", "იმერეთის მოამბე", "ბურთი და მოედანი", „სარბიელი“, "მსოფლიო სპორტი“, worldsport.ge, uefa.com. შესაბამისად, მისი შემოქმედება გაცილებით დიდ პერიოდსა და ათიათასობით ფოტოს მოიცავს.

და მთავარი - ბადრის ქალიშვილი მარიამ (ბუბუ) კეთილაძე ასევე სპორტულ ფოტოგრაფიას მისდევს და მისი პატარა ასაკის მიუხედავად, უკვე არაერთ მნიშვნელოვან სპორტულ ღონისძიებაზე გადაღებული, მამამისს რომ ძალიან გაახარებდა, სწორედ ისეთი ფოტოების ავტორიცაა...