კვიპროსის ნაკრების მთავარმა მწვრთნელმა თემურ ქეცბაიამ ნორვეგიის ნაკრებთან მარცხის (0:4) შემდეგ კომენტარი გააკეთა. როგორც მან თქვა, კვიპროსელ ფეხბურთელებს სათამაშოდ ძალა მხოლოდ 40-50 წუთის განმავლობაში აქვთ.

„საბაბს არ ვეძებთ, მაგრამ ნორვეგიას ჰყავს ფეხბურთელები, რომლებიც მაღალი დონის ლიგებში თამაშობენ, ჩვენთვის კი, რთულია ასეთ დონეზე თამაში. პირველ ტაიმში ვცდილობდით, მაგრამ იღბალიც არ არის ჩვენს მხარეს. 2-3 დღეში არაფერი შეიცვლება, ნორვეგიელები მაღალი დონის ლიგებში 90 წუთი თამაშობენ, ჰყავთ უმაღლესი კლასის ფეხბურთელები, ჩვენ კი ძალა მხოლოდ 40-50 წუთის სათამაშოდ გვაქვს.

გვინდა გამარჯვება, მაგრამ ადვილი არ არის, რადგან ჩვენს ფეხბურთელებს კლუბებში სათამაშო პრაქტიკა არ აქვთ. სამწუხაროდ, ჩვენი პრობლემა მეორე ტაიმებია. საქართველო კარგი გუნდია, მაგრამ არ არის ესპანეთი და ნორვეგია“, - თქვა ქეცბაიამ.

შეგახსენებთ, რომ საქართველოს ნაკრებისა და კვიპროსის მატჩი 15 ოქტომბერს, 17:00 საათზე, თბილისში, „მიხეილ მესხის“ სტადიონზე გაიმართება.