დუდუ დადიანის ხსოვნის ტურნირის ფინალში იმერული კლუბები გავიდნენ. სეზონის პირველი ტიტულისთვის ერთმანეთს ზესტაფონისა და ქუთაისის გუნდები დაუპირისპირდებიან. ტრაგიკულად დაღუპული საქართველოს ეროვნული ფედერაციის ვიცე-პრეზიდენტის მემორიალის 22-ე გათამაშების ფინალი 7 ოქტომბერს, თბილისი არენაზე გაიმართება და ზესტაფონის მარგვეთი ეცდება, ისტორიაში პირველი ტიტული მოიგოს. ქუთაისელებს დადიანის მემორიალი 2-ჯერ აქვთ მოგებული და ცხადია, ტიტულის გასამებას ეცდებიან.

1/2 ფინალი
ზესტაფონის მარგვეთი – ბათუმი
სტატისტიკა: 104:97

ზესტაფონის მარგვეთს სატრანსფერო საქმიანობა დაუფასდა. ჯერჯერობით ასე ჩანს, რომ ქართულ კლუბებში ყველაზე კარგი ლეგიონერები სწორედ ზესტაფონელებს ჰყავთ. აქამდეც და განსაკუთრებით ნახევარფინალში მარგვეთს გამარჯვებაში უპირველესად უცხოელი მოთამაშეები დაეხმარნენ. განსაკუთრებით კი მაიკლ მეიესი, რომელმაც ამჯერად ყველაზე მეტი – 34 ქულა ჩააგდო.

ბათუმი საკმაოდ კარგი გუნდია და მომავალ სუპერლიგაში ამბიციაც ექნება, თუმცა აჭარულ გუნდს ჯერ შეთამაშება უნდა. ამ ეტაპზე კი გამარჯვება იმ გუნდს დარჩა, რომელსაც უკეთესი შემსრულებლები ჰყავდა. მეიესმა 11-დან 7 სამქულიანი ჩააგო, 3-3 სამიანი მიითვალეს აკაკი ლომოურმა და ლუკა ზაქრაძემ. მარგვეთმა მეტოქე პერიმეტრიდან აიკლო და ყველა გეგმა აურია. ბათუმი უფრო გარღვევებით, პოზიციური თამაშით ცდილობდა ხეირის ნახვა, მაგრამ მარგვეთი სისწრაფეშიც არანაკლებად შედეგიანი იყო. ლუკა ზაქრაძე ბურთს მშვენივრად ათამაშებდა და თამაშის ბოლოს 23 ქულასთან ერთად 7 შედეგიანი გადაცემა დაუგროვდა.

ზესტაფონელებმა უპირატესობა თავიდანვე მოიპოვეს და რაც დრო გადიოდა, ლიდერობას იმყარებდნენ. ბათუმელებმა მესამე პერიოდი შედარებით კარგად ითამაშეს და საპირველტაიმო 11-ქულიანი ჩამორჩენა 6-ამდე შეამცირეს. ბოლო ათწუთეულში წესით ვითარება უნდა დაძაბულიყო, მაგრამ პირიქით კი მოხდა. მეიესს ხელი ზესტაფონელთა კიდევ ერთმა ამერიკელმა, ტაიშონ კროუფორდმა შეაშველა, ლუკა ზაქრაძემ კი სტაბილური თამაში განაგრძო და მარგვეთის უპირატესობამ 20 ქულას მიაღწია.

აქ კი ყველაფერი გაირკვა. თამაშის დასრულებამდე 5 წუთი რჩებოდა და ბათუმი თამაშს რომ ვერ შემოაბრუნებდა, ცხადი გახდა. მარგვეთმა მოედანზე ახალგაზრდა, სათადარიგო მოთამაშეებს უხმო და თამაში ბათუმის ბულების ხვეჭით დასრულდა, რომელმაც ჩამორჩენის მხოლოდ შემცირება შეძლო.

1/2 ფინალი
ქუთაისი – თსუ
სტატისტიკა: 81:77

საქართველოსა და დუდუ დადიანის მემორიალის მოქმედი ჩემპიონი თსუ ბრძოლას გამოეთიშა. ლექსო ლაფანაშვილის გაწვრთნილი გუნდი ნახევარფინალიდან ქუთაისმა გააგდო. კოტე ტუღუშის გაწვრთნილმა იმერულმა კლუბმა გამართული კალათბურთი ითამაშა და მაშინ, როცა სოლიდური უპირატესობა გაანიავა და თსუ-მ ანგარიში გაათანაბრა (მე-3 პერიოდში), ძალები მოიკრიბა და მატჩში გარდატეხა ხელმეორედ შეიტანა.

პირველი გარდატეხა ქუთაისელებმა დასაწყისშივე მოახდინეს, როცა 0:10 ჩამორჩენილებმა თამაში დაალაგეს, მეტოქეს პოზიციურად სწორი ტაქტიკა შესთავაზეს და პირველი პერიოდის მეორე ნახევარში შედეგიანი თამაშით ჩამორჩენა მინიმუმამდე შეამცირეს – 15:16. მეორე ათწუთეულში ქუთაისელებმა მაქსიმალურად შეზღუდეს თსუ-ს ტანმაღალი მეფარე გიორგი ტურძილაძე, ხოლო უკანა ხაზში მართალია კახა ჯინჭარაძის დაჭერა უჭირდათ, თუმცა მისგან მიღებულ ქულებს შეტევაში შედეგიანობით ინაზღაურებდა.

თსუ ფიბა ევროპის თასზე გამოდის და ამ ევროტურნირისთვის შემადგენლობას აძლიერებს. ლაფანაშვილის გუნდმა უკვე მეორე ლეგიონერი გაუშვა – სერბი ნიკოლა ვუიოვიჩი, რითაც ტურძილაძეს დამხმარე, თსუ-ს კი ფარქვეშა ძალა მოაკლდა. სამქულიანების მხრივ თსუ-დან გიორგი ცინცაძემ 3, ხოლო მეტ ჯონსონმა 1 შორი სროლა ჩააგდო, რაც, ცხადია, მთლიანი გუნდისთვის ძალიან ცოტაა. თსუ-ს ჰქონდა წარმატების შანსი, თუმცა ბოლო წუთებზე შესრულებული საჯარიმოების ნახევარიც ვერ ჩააგდეს და წასაგებად გაიწირნენ.

ქუთაისში 15 ქულითა და 8 მოხსნით საუკეთესო იყო გიორგი კორსანტია. 13 ქულა დავით ლომიძემ მიითვალა, მარქუს გილსონის ანგარიშზე კი 12 ქულა და 6 მოხსნა აკუმულირდა. თსუ-ში 25 ქულით, 10 მოხსნითა და 5 პასით საუკეთესო იყო კახაბერ ჯინჭარაძე. 16 ქულა ტურძილაძემ, ხოლო 10-10 გიორგი ცინცაძემ და ალექსანდრე ფევაძემ მიითვალეს.

ფინალური შეხვედრა შაბათს, 7 ოქტომბერს, თბილისი არენაზე 15:00 საათზე გაიმართება.

GBF.GE