გერმანიის ნაკრებმა აშშ დაამარცხა და მსოფლიოს ჩემპიონატის ფინალშია! გორდონ ჰერბერტის გუნდმა მთავარ ფავორიტს უდრამატულეს ბრძოლაში, 113:111 აჯობა.

გერმანიის ნაკრები მეტოქეს მთელი მატჩის განმავლობაში ტოლ-სწორად ეთამაშა, საერთოდ არაფერი დაუთმო და გამარჯვებაც დაიმსახურა. უფრო მეტიც, ბოლო მეოთხედის წინ გერმანია 10 ქულით იგებდა და ამერიკელებმა ბოლოს მოახერხეს სხვაობის შემცირება, თუმცა, წაგებას თავი ვერ დააღწიეს.

გერმანიის ნაკრებს ანდრეას ობსტმა ულიდერა 24 ქულით, 22 ქულა ჩააგდო ფრანც ვაგნერმა, ხოლო ამერიკელთა შორის ენტონი ედვარდსი იყო საუკეთესო - 23 ქულა, 8 მოხსნა.

ამრიგად, 10 სექტემბერს, გერმანიის ნაკრები, რომელსაც ტურნირზე ყველა შეხვედრა მოგებული აქვს, ფინალში სერბეთს შეხვდება, ხოლო ამერიკა მესამე ადგილისთვის კანადას გაეჯიბრება.

აშშ - გერმანია 111:113 (31:33, 29:29, 24:35, 27:19)