ვიგოს „სელტას“ ნახევარმცველი გაბრი ვეიგა „ნაპოლის“ ნაცვლად „ალ-აჰლიში“ გადავა. 21 წლის ფეხბურთელმა ასეთი გადაწყვეტილება მიიღო და მხარეებმა ყველა დეტალზე შეთანხმებას მიაღწიეს.

არაბები „სელტას“ ვეიგას გამოსასყიდ 40 მილიონ ევროს გადაუხდიან. არადა, გაბრის „ნაპოლიში“ გადასვლას წინ არაფერი ედგა, სამედიცინო შემოწმებაც ჩანიშნული იყო, მაგრამ ბოლო მომენტში ყველაფერი შეიცვალა.

21 წლის ესპანელის საქციელს გამოეხმაურა ტონი კროოსი, რომელმაც სოციალურ ქსელში კომენტარი დაწერა ერთადერთი სიტყვით, თუმცა, მრავლისმთქმელი: „სამარცხვინო!“

ცნობილია, რომ „ალ-აჰლის“ მანამდე „ნაპოლიდან“ პიოტრ ჟიელინსკის შეძენა სურდა, თუმცა, პოლონელმა იტალიაში დარჩენა გადაწყვიტა. სოციალურ ქსელში ალ-ტანიმ დაწერა: „ახლა შეგიძლიათ თქვენი ფეხბურთელი შეინარჩუნოთ, ჩვენ საუკეთესო ტალანტი გვყავს“.

კომენტარი გააკეთა „სელტას“ მთავარმა მწვრთნელმა რაფაელ ბენიტესმა, რომელმაც ტრანსფერი დაადასტურა და აღნიშნა, რომ გაბრის ეროპაში დასაბრუნებლად საკმარისი დრო აქვს:

„არაბეთში ბევრ ფულს იხდიან, რასაც მისი ცხოვრების შეცვლა შეუძლია, თუმცა, საკმარისი დრო აქვს კონკურენტუნარიან ჩემპიონატში დასაბრუნებლად. მე ჩინეთში ასეთი ფეხბურთელი მყავდა, იანიკ ფერეირა-კარასკო“, - თქვა ბენიტესმა.

გაბრი ვეიგა „სელტას“ აღზრდილია, მთავარ გუნდში კი 55 შეხვედრაში 11 გოლი აქვს გატანილი. ესპანეთის 21-წლამდე ნაკრებში მის ანგარიშზე 8 უგოლო თამაშია. მან ცოტა ხნის წინ ევროპის 21-წლამდელთა ჩემპიონატის ფინალში ბათუმშიც ითამაშა.