დღეს გაიმართა „კრისტალბეთ-ლიგა 2-ის“ 23-ე ტურის მატჩები. ცენტრალური შეხვედრა შედგა საგარეჯოში, სადაც ადგილობრივმა „გარეჯმა“, რომელიც გათამაშების ლიდერია, „სპაერს“ უმასპინძლა. ამ მატჩამდე, „სპაერი“ მასპინძლებს სატურნირო ცხრილში 5 ქულით ჩამორჩებოდა, და ცხადია, ორივე გუნდისთვის მნიშვნელოვანი იყო გამარჯვების მოპოვება.

შეხვედრა დაძაბული და საინტერესო გამოდგა. 22-ე წუთზე მასპინძლები პაპუნა ფოიავას გოლით დაწინაურდნენ. 42-ე წუთზე სტუმრებს ანგარიშის გათანაბრების საშუალება მიეცათ, მაგრამ კობა ქებურიამ ვერ გამოიყენა „გარეჯის“ კარში დანიშნული თერთმეტმეტრიანი. ვიდრე მატჩის არბიტრი გუნდებს შესვენებაზე გაიხმობდა, ბექა გაბისკირიამ იყოჩაღა და მასპინძლები 2:0 დაწინაურდნენ.

შესვენების შემდეგ, სტუმრები აქტიურობდნენ. 57-ე წუთზე, მასპინძელთა ნახევარმცველმა გიორგი პაპუაშვილმა საკუთარ კარში ჩაჭრა ბურთი. სამ წუთში კი „სპაერმა“ საბა გეგიაძის გოლით გაათანაბრა ანგარიში - 2:2.

79-ე წუთზე, ბექა გაბისკირიას პასით, გიორგი ხარებაშვილმა გამარჯვების გოლი გაიტანა „სპაერის“ კარში - 3:2.

ამრიგად, „გარეჯმა“ კიდევ ერთი ნაბიჯი გადადგა უმაღლესი ლიგისკენ. კახურ გუნდს 23 შეხვედრიდან 51 ქულა აქვს და პირველ ადგილზეა.

მომდევნო ტურში, 29 აგვისტოს, „გარეჯი“ სტუმრად ეთამაშება „ლოკომოტივს“. რომელიც სატურნირო ცხრილში გასავარდნ ზონაში იმყოფება.