საქართველოს ნაკრების მცველი ირაკლი აზაროვი კარიერას დონეცკის „შახტარში“ გააგრძელებს, რომელთანაც 5-წლიანი კონტრაქტი გააფორმა. ქართველმა მცველმა უკრაინული გუნდის ვებგვერდს ინტერვიუ მისცა, სადაც პირველ შთაბეჭდილებებზე ისაუბრა.
- ირაკლი, კეთილი იყოს თქვენი მობრძანება "ნარინჯისფერ-შავ" ოჯახში! თქვენ ახლახან ჩაატარეთ თქვენი პირველი ვარჯიში მაღაროელებთან. როგორ გაიცანით გუნდი?
- წარმოუდგენელი იყო, რადგან ვიცი, რა კარგი გუნდია „შახტარი“. ჩემმა პირველმა ვარჯიშმა ძალიან კარგად ჩაიარა. წინ მივდივარ და ვტკბები ჩემი ახალი სახლით.
- როდესაც პირველად გაიგეთ, რომ „შახტარი“ დაინტერესდა თქვენით, რა იფიქრეთ და რა იყო საკვანძო ფაქტორი დონეცკელთა შემოთავაზების მისაღებად?
- აქ, პირველ რიგში, ჩემი მეგობარი გიორგი გოჩოლეიშვილი თამაშობს, მას დიდი ხანია ვიცნობ. ჩემს გადაწყვეტილებაზე ასევე იმოქმედა ჩემპიონთა ლიგაში თამაშისა და განვითარების სურვილმა, რადგან ვიცი, რომ „შახტარს“ დიდი ისტორია აქვს და ბევრი შესაძლებლობების შეთავაზება შეუძლია. ასე რომ, ყველაფერს გავაკეთებ, რომ გუნდთან ერთად ვიმუშაო, რათა წინსვლა გავაგრძელო.
- რა გითხრა გოჩოლეიშვილმა ტრანსფერამდე?
- "შახტარის" ინტერესის შესახებ რომ შეიტყო, დამირეკა და მითხრა, რა სიტუაციაა ახლა. ვესაუბრე ჩემს ოჯახს, ჩემს მეგობრებს, ჩემს მეუღლეს და გადავწყვიტე, რომ აქ ჩამოვსულიყავი.
- „შახტარის“ მატჩებს თვალყურს ადევნებდი? გუნდზე რას იტყვით?
- ვიცი, რომ ახალი მწვრთნელი მოვიდა, ამიტომ ვფიქრობ, ძალიან ძლიერი გუნდი ვიქნებით. ყოველდღე, ყოველი თამაშით უკეთესები გავხდებით. ვფიქრობ, ყველაფერს გავაკეთებთ.
- რა არის შენი ძლიერი თვისებები, რომლითაც შეგიძლია დაეხმარო გუნდს?
- ვფიქრობ, რომ ჩემი ყველაზე დიდი უპირატესობა ტექნიკაა, მაგრამ ცოტა ფიზიკური ფორმა უნდა გავაუმჯობესო. მაგრამ მე აქ ამისთვის ვარ - ყოველდღე უკეთესი უნდა გავხდე.
- უფრო სწრაფად ადაპტაციაში დაგეხმარებათ ის, რომ თქვენ და გიორგი გოჩოლეიშვილი ერთმანეთს კარგად იცნობთ?
- რა თქმა უნდა, გიორგის როლი ჩემს ადაპტაციაში ძალიან მნიშვნელოვანი იქნება, რადგან ის შვიდი-რვა თვეა აქ არის და დამეხმარება.
- რა ნომრით ითამაშებ და რატომ?
- „შახტარში“ მექნება 16 ნომერი. პროფესიონალური საფეხბურთო კარიერა ამ ნომრით დავიწყე „დინამოში“ (თბილისი), ამიტომ აქაც ავირჩიე.
- არ გეშინოდათ უკრაინაში წასვლის, სადაც ამჟამად სრულმასშტაბიანი ომი მიმდინარეობს?
- დიახ, იყო შიშები, მაგრამ გიორგიმ მითხრა უკრაინაში არსებულ ვითარებაზე. მე ვიცი, რომ საშიშროება არის ის, რომ ადამიანებს ნორმალური ცხოვრება არ შეუძლიათ. მაგრამ კლუბი ზრუნავს ჩვენს უსაფრთხოებაზე. რა თქმა უნდა, მე მხარს ვუჭერ უკრაინას და ყველაფერს გავაკეთებ „შახტარისთვის“ და ჩემი ახალი ოჯახისთვის.
- უკრაინელ გულშემატკივრებს რას ეტყვით?
- წინ უკრაინა! დიდება გმირებს! დიდება უკრაინას!
