არცთუ დამაჯერებლად (მეორე ტაიმში), მაგრამ „არსენალმა“ მაინც მოიგო ახალდაწყებული პრემიერლიგის პირველ ტურში. მსხვერპლი - „ნოტინგემ ფორესტი“ აღმოჩნდა.

თავიდან ყველაფერი ისე ჩანდა, რომ „მეტყევეები“ უშანსოდ დამარცხდებოდნენ. პირველ ტაიმში „მეთოფეები“ მეტოქის საჯარიმოს არ შორდებოდნენ, ბურთს დაახლოებით 85 პროცენტით ფლობდნენ, ნკეიტამ და საკამ ლამაზი გოლებიც გაიტანეს.

შესვენების შემდეგაც ლონდონელები თითქოს აკონტროლებდნენ სიტუაციას, მაგრამ მოდუნდნენ და ზეწოლაც შეასუსტეს. სამაგიეროდ „ნოტინგემი“ გამხნევდა, რამდენჯერმე სახიფათოდ შეუტია, გოლიც გაიტანა და ბოლო წუთებში მასპინძლები გვარიანად ანერვიულა. საბოლოოდ მოულოდნელობა არ მოხდა - „არსენალმა“ 2:1 გაიმარჯვა და პირველი სამი ქულაც მოიპოვა.

მატჩი 30 წუთის დაგვიანებით დაიწყო, „ემირეითსზე“ დამონტაჟებული ახალი ციფრული ტურნიკეტების გამო. გულშემატკივრები ელექტრონულ ბილეთებს ვერ ასკანირებდნენ და შესასვლელებში ქაოსი შეიქმნა.

სხვა მატჩებიდან გამოსარჩევია ტურნირის კიდევ ერთი ფავორიტის, „ნიუკასლის“ დიდი ანგარიშით გამარჯვება. „კაჭკაჭებმა“ „ასტონ ვილა“ 5:1 გაანადგურეს. დუბლი მიითვალა შვედმა ალექსანდერ ისაკმა. სადებიუტო გოლი გაიტანა „მილანიდან“ „ნიუკასლში“ გადაბარგებულმა სანდრო ტონალიმ.

თითოც კალუმ უილსონმა და ჰარვი ბარნსმა შეაგდეს. ჯერჯერობით 3-ქულიანი „ნიუკასლი“ გათამაშების ცხრილს სათავეში მოექცა ბურთების უკეთესი ბალანსის წყალობით.. ისე, კიდევ 5 გუნდს აქვს 3 ქულა.

პირველი ტური კვირას, „ბრენტფორდ“ – „ტოტენჰემისა“ და „ჩელსი“ – „ლივერპულის“ მატჩებით გაგრძელდება და ორშაბათს, „მანჩესტერ იუნაიტედისა’ და „ვულვერჰემპტონის“ შეხვედრით დასრულდება.

ინგლისი

პრემიერლიგა 2023/24

1 ტური

არსენალი - ნოტინგემ ფორესტი 2:1

ლონდონი. „ემირეითსი“

1:0 ნკეტია (26), 2:0 საკა (32), 2:1 ავონი (82)

არსენალი: რემსდეილი, უაითი, სალიბა, ტიმბერი (ტომიასუ 50), პარტი, რაისი, ჰავერცი, ედეგორი, საკა, ნკეიტა (ტროსარი 73), მარტინელი (გაბრიელ მაგალაეში 86)

მწვრთნელი: მიკელ არტეტა

ნოტინგემ ფორესტი: ტერნერი, ბოლი, უორელი (ვუდი 90+1), მაკენა, ორიე, იეიტსი, მანგალა (კუიატე 90+1), აინა (უილიამსი 72), დანილო (ავონი 71), გიბს-უაითი, ჯონსონი (ელანგა 80)

მწვრთნელი: სტივ კუპერი

მსაჯი: მაიკლ ოლივერი

გაფრთხილება: ტიმბერი (45+5), უაითი (90+3); აინა (28), მანგალა (81)

ნიუკასლი - ასტონ ვილა 5:1

1:0 ტონალი (6), 1:1 დიაბი (11), 2:1, 3:1 ისაკი (16, 58), 4:1 უილსონი )77), 5:1 ბარნსი (90+1)

ევერტონი - ფულემი 0:1

0:1 დე კორდოვა რიდი (73)

შეფილდ იუნაიტედი - კრისტალ პალასი 0:1

0:1 ედუარი (50)

ბრაიტონი - ლუტონი 4:1

1:0 მარჩი (36), 2:0 ჟოაო პედრო (71 პენ), 2:1 მორისი (79 პენ), 3:1 ადინგრა (85), 4:1 ფერგიუსონი (90+6)

ბორნმუთი - ვესტ ჰემი 1:1

0:1 ბოუენი (51), 1:1 სოლანკე (83)