ხვიჩა კვარაცხელიამ „ნაპოლიში“ წინასასეზონო გეგმური სამედიცინო შემოწმება გაიარა და ხვალიდან ვარჯიშს დაიწყებს.

როგორც ნეაპოლიტანური კლუბის ვებგვერდი წერს, სტანისლავ ლობოტკამ, ვიქტორ ოსიმენმა, ამირ რაჰმანიმ, ელიფ ელმასმა, ალექს მერეტმა, ლეო ოსტიგორმა, პიოტრ ჟელინსკიმ, ჯაკომო რასპადორიმ და ცხადია, კვარამ სამედიცინო შემოწმება გაიარეს.

მათ დიმაროს ბაზაზე შეკრებილი გულშემატკივრებიც ოვაციებით დახვდნენ. ეს ფეხბურთელები გუნდთან ერთად 19 ივლისიდან ივარჯიშებენ.

„ნაპოლი“ პრესეზონზე პირველ ამხანაგურ მატჩს 20 ივლისს, „ანაუნესთან“ ჩაატარებს, მაგრამ ნაკლებად სავარაუდოა, რომ ქართველმა მასში მონაწილეობა მიიღოს, უფრო დიდი ალბათობით, 24 ივლისს, „სპალის“ წინააღმდეგ ითამაშებს.

შეგახსენებთ, რომ „ნაპოლი“ სერია A-ს პირველ ტურში 19 აგვისტოს, გიორგი კვერნაძის „ფროზინონეს“ სტუმრად დაუპირისპირდება.