გორის „დილამ“ კონფერენს ლიგის პირველ საკვალიფიკაციო ეტაპზე „დუნაისკა სტრედასთან“ სტუმრად მარცხი განიცადა, თუმცა მომდევნო ეტაპზე გასვლის მაღალი შანსი მაინც აქვს.

ანდრეი დემჩენკოს გუნდი, რომლის ძირითად შემადგენლობაში 8 ლეგიონერი იყო, სლოვაკურ გუნდს პრაქტიკულად არაფერში ჩამორჩა, ვერ ვიტყვით, რომ წასაგები თამაში ჰქონდა, თუმცა, ყველაფერი გორში უნდა გადაწყდეს.

თამაშიც თანაბარ ბრძოლაში დაიწყო, ინიციატივა არცერთ გუნდს ჰქონია, თუმცა, „დილასთვის“ გადამწყვეტი პირველი ტაიმის ბოლოს 3-წუთიანი მონაკვეთი გამოდგა, როცა დაცვაში ორი შეცდომა ორ გოლად დაუჯდა. მატეი ტრუსამ და ამარ რამადანიმ გორელთა კარში ორჯერ გაიტანეს და სლოვაკები 2:0 დაწინაურდნენ.

იქიდან გამომდინარე, რაც მანამდე მოედანზე ხდებოდა, ეს ნამდვილად არ იყო სამართლიანი შედეგი. კარგია, რომ „დილამ“ 43-ე წუთზე მოახერხა ერთი ბურთის გაქვითვა: მიკოლა კოვტალიუკმა მეკარესთან პირისპირ დარჩენილმა ივარგა და სხვაობა შეამცირა.

მეორე ტაიმში გუნდების მცდელობის მიუხედავად არაფერი შეცვლილა. ზოგადად, სლოვაკებიც და ქართველებიც რისკზე არ მიდიოდნენ, რაც ბუნებრივია, რადგან მისი ფასი დიდი იყო. თუმცა, უნდა აღინიშნოს, რომ 97-ე წუთზე ტიერი გეილის დარტყმის მერე „დუნაისკა სტრედა“ მეკარემ სასწაულებრივ იხსნა, არადა, გორელები ახლოს იყვნენ 2:2-თან, რაც შესანიშნავი შედეგი იქნებოდა.

ამის მიუხედავად, გორის „დილა“ არც ახლაა უშანსოდ და ყველაფერი 20 ივლისს, გორში, „თენგიზ ბურჯანაძეზე“ გადაწყდება.

„დუნაისკა სტრედა“ – „დილა“ 2:1 (2:1)

დუნაისკა სტრედა, „მოლ არენა“

დუნაისკა სტრედა (4-3-3): პეტრაში; ალექს პინტო, რისვანისი, ბრუნეტი, ანზუანა; კაჩერი (გავრიჩი 72), დიმუნი, კალმარი (ვიტალისი 72); ტრუსა (ვესელოვსკი 85), კრსტოვიჩი, რამადანი

მწვრთნელი: ადრიან გულ’ა

დილა (4-3-3): კუჩერენკო; ჩიტეიშვილი, ძოწენიძე, ეტოუ (თევზაძე 87), ვანდერსონი; ჟან ვიქტორი, ალეფ სანტოსი, ფარულავა (სარდალიშვილი 64); გომისი (მზაკვალი 72), კოვტალიუკი (კუხიანიძე 64), გეილი

მწვრთნელი: ანდრეი დემჩენკო

გოლები: 1:0 ტრუსა (33), 2:0 რამადანი (36), 2:1 კოვტალიუკი (43)

გაფრთხილება: კაჩერი (61), რისვანისი (61), კრსტოვიჩი (90) - ალეფ სანტოსი (45), კოვტალიუკი (45), სარდალიშვილი (77)

სტატისტიკა - კარისკენ დარტყმები: 11 (7) – 5 (3) ბურთის ფლობა: 37%-63% კუთხურები: 6:2 თამაშგარე: 2:1

მსაჯი: იარედ ჟილე (ავსტრალია)