ქართველი თავდამსხმელი გიორგი კვერნაძე „ფროზინონემ“ ოფოციალურად წარადგინა.
20 წლის ფეხბურთელის პრეზენტაცია „სტადიო ბენიტო სტირპეზე“ გაიმართა, სადაც მასთან ერთად მისი აგენტი, ვეტერანი ქართველი მეკარე, ნუკრი რევიშვილი იყო.
„ჩვენი ახალი ლომი - გიორგი კვერნაძე“, - წერს იტალიური კლუბი სოციალურ ქსელში. გიორგი „ლურჯ-ყვითლებს“ ერთწლიანი იჯარით და გამოსყიდვის უფლებით შეუერთდა.
გიორგი კვერნაძე „საბურთალოს“ აკადემიის აღზრდილია, შარშან „თელავში“ თამაშობდა, ხოლო იანვრიდან „დინამო ბათუმში“ იყო, სადაც მხოლოდ 7 მატჩი ჩაატარა, მისი სატრანსფერო უფლებები კი ფოთის "კოლხეთს" ეკუთვნის. გიორგის მიმართ „ფროზინონე“ ინტერესს რამდენიმე თვის განმავლობაში იჩენდა. ასე რომ, მომდევნო სეზონში ხვიჩა კვარაცხელიას გარდა, იტალიის სერია A-ში კვერნაძეც ითამაშებს, ხოლო მისი კლუბის მიზანი ცხადია, ელიტაში ადგილის შენარჩუნება იქნება.
„ფროზინონე“ მომდევნო სეზონს სერია A-ში გაატარებს, ისტორიაში მესამედ 2015-2016 და 2018-2019 წლების სეზონების შემდეგ. გუნდს გასულ სეზონში მსოფლიოს ჩემპიონი ფაბიო გროსო ავარჯიშებდა, მაგრამ მან თანამდებობა დატოვა და ეუსებიო დი ფრანჩესკომ შეცვალა.
აქვე ვთქვათ, რომ იტალიის სერია A-ში აქამდე ოთხ ქართველ ფეხბურთელს აქვს ნათამაშები: კახა კალაძეს "მილანსა" და "ჯენოაში", ლევან მჭედლიძეს "პალერმოსა" და "ემპოლიში", ხვიჩა კვარაცხელიას "ნაპოლიში" და ლუკა ლოჩოშვილს "კრემონეზეში".
