საქართველოს ნაკრების ნახევარმცველი გიორგი აბურჯანია კარიერას თურქეთის სუპერლიგის ბინადარ „ჰატაისპორში“ გააგრძელებს.

ქართველმა ნახევარმცველმა სამედიცინო შემოწმება გაიარა და 3-წლიანი კონტრაქტი გააფორმა. „ჰატაისპორს“ ეკუთვნის საბა ლობჟანიძეც, რომელმაც გასული სეზონის მეორე ნახევარი იჯარით „კარაგუმრუკში“ გაატარა, რადგან კლუბის დატოვება მიწისძვრის შემდეგ მოუწია.

მოგეხსენებათ, ჰატაის პროვინცია მიწისძვრის ეპიცენტრი იყო, რის გამოც კლუბი სეზონს ჩაეხსნა, მაგრამ სუპერლიგაში ადგილი შეუნარჩუნდა. ამრიგად, ანტაკიელებში მომდევნო სეზონში ორი ქართველი ითამაშებს.

გიორგი აბურჯანია 2021-2023 წლებში „ჟილ ვისენტეში“ ირჯებოდა და 63 მატჩში 2 გოლი გაიტანა. მანამდე მას არაერთგან აქვს ნათამაშები, მათ შორის რუსთავის „მეტალურგში“, „დილაში“, „ლოკომოტივში“, „ანორთოსისში“, „ხიმნასტიკში“, „სევილია 2“-ში, „ლუგოში“, „ტვენტეში“, „ოვიედოსა“ და „კატრახენაში“, ხოლო საქართველოს ნაკრებში ჩატარებულ 38 შეხვედრაში 1 გოლი გაიტანა.