უმცროსმა ბორჯღალოსნებმა სამხრეთ აფრიკაში მიმდინარე მსოფლიო რაგბის 20-წლამდელთა ჩემპიონატის პირველ მატჩში, მასპინძელთა გუნდს ტოლი არ დაუდეს და გამარჯვებასაც იმსახურებდნენ, მაგრამ მეტოქის მგეზავმა ჟან სმითმა და უიღბლობამ, ჩვენს ბიჭებს კიდევ ერთი ისტორიული შედეგის დაფიქსირების შესაძლებლობა არ მისცა.

ორივე გუნდმა 3-3 ლელო გაიტანა და უმცროსი ქურციკების გამარჯვება სმითის ფეხ-ჩუბინობამ განაპირობა, რომელმაც კარში 100%-იანი მაჩვენებლით ურტყა და ტაქტიკური დარტყმებიც უზადოდ შეასრულა. გულდასაწყვეტია, რომ მეტოქემ ორი ლელო მას შემდეგ გაიტანა, რაც ჩვენს 22-ში რაქიდან ბურთი გამოგვივარდა, გარდამტეხი კი ის 8-წუთიანი მონაკვეთი აღმოჩნდა, რომლის დროსაც სამხრეთ აფრიკა კაცნაკლული იყო და უპირატესობის ქულებში ასახვის ნაცვლად, 13 ქულა აქეთ მივიღეთ.

და მაინც, უმცროსმა ბორჯღალოსნებმა, რომლებმაც ერთი თვის წინ ინგლისთან ისტორიული გამარჯვება მოიპოვეს, მთელს მსოფლიოს დაანახეს, რომ მისთვის „დიდი გუნდები“ არ არსებობენ და ქართულ რაგბს უზარმაზარი პოტენციალი აქვს! საქართველო, მასპინძელ სამხრეთ აფრიკასთან (რომელიც ჩემპიონატის მოგების ერთ-ერთი ფავორიტია), განსაკუთრებით მეორე ტაიმში უზარმაზარ სათამაშო უპირატესობას ფლობდა და გამარჯვებასაც იმსახურებდა!

პირველმა ტაიმმა უმეტესად ჩვენს ნახევარზე ჩაიარა. სამხრეთ აფრიკამ ფორვარდებით შემოგვიტია, მაგრამ ძლიერ დაცვას წააწყდა. საწყისი წუთებიდან თან ახლდა მღელვარება, რის გამოც ხშირად ვჯარიმდებოდით და სმითმა მე-3 წუთზე ანგარიში გახსნა. მალევე ჩვენს 22-ში რაქიდან გამოვარდნილი ბურთი კატლეგო ლეტებელემ აიტაცა, ფეხით მოკლეზე გადაიკიდა და ინდივიდუალური, ლამაზი ლელო გაიტანა. სმითმა უპირატესობა 10 ქულამდე გაზარდა.

უმცროსმა ბორჯღალოსნებმა პირველად მე-12 წუთზე შეუტიეს. ლუკა ცირეკიძე ჩვენი ნახევრიდან დაიძრა, რამდენიმე მბოჭავი ჩამოიცილა და 25-30 მეტრი მოიგო, რასაც ჯარიმა მოყვა. პეტრე ხუციშვილმა ბურთი აუტში გადაიტანა, დერეფნიდან მძლავრი მოლი დაიძრა, რომელმაც დიდი წინააღმდეგობის მიუხედავად 10 მეტრი დაფარა, მორკინალების რამდენიმე დარტყმის შემდეგ კი ლაშა ციხისთავმა თანაგუნდელების დახმარებით ლელო გაიტანა და ხუციშვილმა გარდასახა – 7:10.

მასპინძლებმა მალევე შეძლეს ინიციატივის დაბრუნება და ფორვარდები ჩვენს დაცვას თავგანწირვით შეასკდნენ, მაგრამ გაუვალ კედელს წააწყდნენ. 23-ე წუთზე, ერთ-ერთი ასეთი ეპიზოდის შემდეგ, ბურთი მარჯვენა ფრთაზე გაიშალა, დაცვამ თითქოს შეძლო გადაწყობა და სივრცეების შევსება, თუმცა ჯურენზო ჯულიუსმა აკრობატულ ნახტომში ალამთან მაინც შეძლო ლელოს გატანა. სმითმა ურთულესი პოზიციიდან გარდასახა, შესვენების წინ კი ჯარიმით მორიგი 3 ქულა მიითვალა და ტაიმი სამხრეთ აფრიკის გამარჯვებით დასრულდა – 20:7.

მეორე ტაიმში მაყურებელმა რადიკალურად განსხვავებული თამაში იხილა. თუ არ ჩავთვლით 8-წუთიან ჩავარდნას, საქართველო ყველა კომპონენტში დომინირებდა და მეთოდურად ამცირებდა ჩამორჩენას. ისე ჩანდა, რომ უმცროსი ბორჯღალოსნები დამსახურებულ და ამავდროულად, სენსაციურ გამარჯვებას მოიპოვებდნენ, მაგრამ…

და მაინც, საქართველომ სამხრეთ აფრიკას მისსავე მოედანზე, სტელენბოშში ტაიმი 16:13 მოუგო, რაც უდიდესი მიღწევა და მთელი გუნდის ერთიანობის დამსახურებაა, რომელიც მომავალ შეხვედრებში აუცილებლად მოიტანს სასურველ შედეგს.

საგულისხმოა, რომ თამაშის განახლების შემდეგ უმცროსმა ბორჯღალოსნებმა აფრიკელები შერკინებაში ზედიზედ 4-ჯერ დააჯარიმეს. შედეგად, 45-ე წუთზე ხუციშვილმა ჯარიმით სხვაობა შეამცირა, ბურთის კონტროლი გააგრძელა, მეტოქის ნახევარზე ფეხი მოიკიდა და 58-ე წუთზე ლამაზი ლელო გაიტანა.

ამ შეტევაში თორნიკე კახოიძემ ორჯერ გაჭრა ხაზი. პირველ შემთხვევაში შეტევა მარჯვენა ფრთაზე გაგრძელდა, მეორე ეპიზოდში კი მან გრძელი გადაცემით მარცხენა ფრთაზე ცირეკიძე მოძებნა და მანაც ლელოთი სხვაობა 5 ქულამდე დაიყვანა, სამწუხაროდ გარდასახვა არაზუსტი იყო. 62-ე წუთზე ლუკა ხორბალაძემ საჰაერო ბრძოლა მოიგო, რასაც ნიკა ბაბუნაშვილის მძლავრი მიძალება მოყვა და მომრავლებული ჯარიმების ფონზე, აფრიკელები სინბინით დაისაჯნენ. ხუციშვილმა ჯარიმა გაიტანა და სხვაობა 2 ქულამდე დაიყვანა, საქართველოს კი დაახლოებით 9 წუთი რიცხობრივი უპირატესობა ჰქონდა…

ამის ფონზე მოხდა ის, რასაც არავინ ელოდა. მსაჯმა ზედიზედ ორჯერ საკამათო ეპიზოდებში დაგვაჯარიმა და სმითმა დარტყმა ყველა პოზიციიდან უნაკლოდ შეასრულა, მერე კი ჩვენს 22-ში ერთხელაც გამოგვივარდა რაქიდან ბურთი და ითან ჰუქერმა ლელო, სმითმა კი გარდასახვა გაიტანა.

უმცროსი ბორჯღალოსნების სასახელოდ უნდა ითქვას, რომ ისინი არ გატყდნენ და 76-ე წუთზე თამაშში კიდევ ერთხელ დაბრუნდნენ. 5-მეტრიანი დერეფნიდან აგორებული მოლი ლელოთი ნიკა ბაბუნაშვილმა დაასრულა. გელა ხელაძეს გარდასახვა გაუცუდდა. დასკვნით წუთებში საქართველო კიდევ ერთი ლელოს გატანით 2 ბონუს-ქულას მიიღებდა, რაც მინიმუმი იყო რასაც ეს გუნდი იმსახურებდა, თუმცა შედეგიანი შეტევის ორგანიზება ვეღარ მოხერხდა და სამხრეთ აფრიკამ 20-წლამდელთა ჩემპონატის პირველ მატჩში 33:23 იმარჯვა.

გ ჯგუფის პირველ შეხვედრაში არგენტინამ იტალია 43:15 დაამარცხა და ბონუსიც აიღო. 29 ივნისს, საქართველოს დროით 18:30 საათზე, უმცროსი ბორჯღალოსნების მეტოქე სწორედ არგენტინა იქნება.

ლადო კილასონია (მთავარი მწვრთნელი): „ჩვენი გეგმა იყო, რომ წნეხის გარეშე გვეთამაშა. ჩამოვედით სამხრეთ აფრიკაში და პირველი შეხვედრა გვქონდა მასპინძელ სამხრეთ აფრიკასთან. რაც უფრო დიდხანს დავრჩებოდით თამაშში და ანგარიში იქნებოდა მჭიდრო, ყოველი წუთი იმუშავებდა ჩვენზე. ამ გეგმამ მეორე ტაიმში იმუშავა, როდესაც კარგად წავიდა რაც დაგეგმილი გვქონდა, მაგრამ სამწუხაროდ, მომენტი, როდესაც შეგვეძლო მისი შემოტრიალება, ხელიდან გავუშვით და სამხრეთ აფრიკამ ეს კარგად გამოიყენა“.

„ვფიქრობ, ამ ბიჭებით ყველამ უნდა ვიამაყოთ, რადგან ძალიან რთულია ჩამოხვიდე სამხრეთ აფრიკაში და ეთამაშო ასე, ძალიან რთულია, მაგრამ ნამდვილად შეგვეძლო მეტი…“.

თორნიკე კახოიძე: „ასეთ დიდ ტურნირში პირველი თამაში იყო და ძალიან ბევრი კარგი მომენტები გვქონდა. შემდეგი თამაშებისთვის ვიმუშავებთ ჩვენი შეცდომების გამოსწორებაზე. ვფიქრობ ყველამ დაინახა რა შეგვიძლია“.

ლუკა ცირეკიძე: „კარგი თამაში გამოგვივიდა და დიდი გამოცდილება შევიძინეთ. სამხრეთ აფრიკასთან 10 ქულა დავთმეთ. მსოფლიოს ჩემპიონატზე პირველი ლელო ყველასთვის შოკისმომგვრელია და ასე იყო ჩემთვისაც. მომდევნო შეხვედრებისთვის ვიმუშავებთ შეცდომების გამოსწორებაზე და ვიმედოვნებ შედეგიც უკეთესი იქნება“.

ხაზი: 15. ვაჟა მიქაძე (ლელო), 14. ლუკა ცირეკიძე (ლელო), 13. თორნიკე კახოიძე (შავი ლომი), 12. გიორგი შველიძე (ბრივი), 11. შალვა აფციაური (ლელო), 10. პეტრე ხუციშვილი (ლელო), 9. დავით ხუროშვილი (ლელო);

შერკინება: 1. გიორგი მამაიაშვილი (გრენობლი), 2. ბასა ხონელიძე (ორიაკი), 3. ბადრი ციხისთავი (ბეიონი), 4. გურამ ღანიაშვილი (გრენობლი), 5. გიორგი ნიკოლაძე (აია), 6. რატი ზაზაძე (ნევერი), 7. ლაშა ციხისთავი (ბეიონი, კაპ.), 8. ნიკა ლომიძე (ხარები);

მარქაფა: 16. ნიკა ბაბუნაშვილი (ლელო), 17. ლაშა ფხაკაძე (ნევერი), 18. ირაკლი აფციაური (გრენობლი), 19. გიორგი გერგედავა (კლერმონი), 20. თორნიკე ღანიაშვილი (ლელო); 21. ალექსანდრე ჯიღაური (ლელო), 22. გელა ხელაძე (ლელო), 23. ლუკა ხორბალაძე (ლელო).

მთავარი მწვრთნელი: ლადო კილასონია

3 ლელო: ლაშა ციხისთავი, ლუკა ცირეკიძე, ნიკა ბაბუნაშვილი

1 გარდასახვა: პეტრე ხუციშვილი

2 ჯარიმა: პეტრე ხუციშვილი

RUGBY.GE