საქართველოს ძიუდოისტთა ნაკრები, რომელიც ყაზახეთის გრანდ სლემზე გადახალისებული შემადგენლობით გამოდის, ორი დღის შემდეგ უმედლოდაა.

73 კგ წონით კატეგორიაში კოტე კაპაანძემ რეშად მოდ არიანს აჯობა, მაგრამ მერე ყაზახ ჟანსაი სმაგულოვთან წააგო და ასპარეზობას გამოეთიშა. მედალთან უფრო ახლოს იყო გიორგი ტერაშვილი, რომელმაც რუსლან ჰალავაჩოუ და კსავერი მორკა დაამარცხა, მერე დანიარ შამშაიევთან წააგო და რეპეშაჟში გადავიდა, სადაც ალჟირელ რედუან დრისს მოუგო, მაგრამ მედლისთვის შეხვედრაში ყაზახ ასკარ ნარკულოვთან წააგო.

81 კგ წონით კატეგორიაში ზაურ დვალაშვილი პირველივე წრეში ყაზახ აიბოლ ნისანალისთან დამარცხდა, ხოლო დიმიტრი გოჩილაიძემ ბრიტანელი სკოტ კუსაკი, ყაზახი აბილაიხან ჟუბანჟარი და გერმანელი დომინიკ რესელი დაამარცხა, მაგრამ ჯერ ნახევარფინალი წააგო ტაჯიკ სომონ მახმადბეკოვთან, მერე ბრინჯაოს მედლისთვი შეხვედრა ესპანელ ხოსე მარია მენდიოლასთან.

ყაზახეთის გრანდ სლემის ბოლო საშეჯიბრო დღეს ტატამიზე ქართველი ძიუდოისტები კიდევ გავლენ.