„მანჩესტერ სიტის“ მთავარმა მწვრთნელმა პეპ გვარდიოლამ „ინტერთან“ გამარჯვებისა და ჩემპიონთა ლიგის მოგების შემდეგ კომენტარი გააკეთა. როგორც მან აღნიშნა, ჩემპიონთა ლიგა მონეტის აგდებას ჰგავს, ნამდვილი შრომა შიდა ჩემპიონატში ჩანს.

„ჩემპიონთა ლიგა მონეტას ჰგავს. შეიძლება ბევრად უფრო ძლიერი იყო, მაგრამ ამას არ აქვს მნიშვნელობა, როცა „ინტერის“ წინააღმდეგ თამაშობ. ვიცით, რომ შეიძლებოდა მატჩი ფრედ დასრულებულიყო, შეიძლებოდა წაგვეგო კიდეც ან უფრო მშვიდად მოგვეგო, ფოდენს რომ გაეტანა. ჩემპიონთა ლიგა ასეთი ტურნირია, მონეტის აგდებას ჰგავს. ტრებლი შევასრულეთ, ეს უნიკალური ემოციაა, ძალიან ბედნიერი ვარ.

მე თამაშზე ყოველთვის ერთი და იგივე იდეა მაქვს, ეს არის ბურთის სწორად ფლობის მცდელობა. სამწუხაროდ, ხანდახან ძლიერ გუნდებთან თამაში გვიწევს და ეს რთული ხდება. ვიცოდი, რომ „ინტერთან“ გაგვიჭირდებოდა. ისინი ევროპის მეორე გუნდი არიან ამჟამად და პატარას არ ნიშნავს ევროპის მეორე გუნდი იყო. რთულია მის წინააღმდეგ თამაში, ფიზიკურად ძლიერები არიან. იტალიური ფეხბურთი აღარ არის უბრალოდ ბურთის წინ გადაგდება, შეხედეთ, როგორ თამაშობს „ინტერი“, როგორ თამაშობს „ნაპოლი“, როგორ ითამაშა გასულ სეზონში პიოლის „მილანმა“. იტალიური ფეხბურთი აღარ არის ისეთი, როგორიც ადრე იყო, ეს დრო დასრულდა. იტალიელების დამარცხება ადვილი არ არის. „ბარსელონას“ ტრებლთან შედარებით შევიცვალე? არა, არ შევცვლივარ. უბრალოდ ადაპტაცია მოვახდინე იმ ფეხბურთელებთან, რომლებიც განკარგულებაში მყავს.

როგორც ვთქვი, ჩემპიონთა ლიგა მონეტის აგდებას ჰგავს. მწვრთნელის ნამდვილი შრომა შეიძლება დაინახოთ და შეფასდეს შიდა ჩემპიონატის 38 მატჩით. თუ ვინმე კარგად თამაშობს საკუთარი ქვეყნის ჩემპიონატში, ეს ნიშნავს, რომ ის მწვრთნელი ძალიან კარგად მუშაობს“, - თქვა გვარდიოლამ.

შეგახსენებთ, რომ „მანჩესტერ სიტიმ“ ისტორიაში პირველად მოიგო ჩემპიონთა ლიგა სეზონი ტრებლით დაასრულა. პეპ გვარდიოლა მწვრთნელის რანგში მესამედ დაეუფლა ჩემპიონთა ლიგას, პირველად 2011 წლის შემდეგ და ასევე პირველად „ბარსელონას“ მიღმა.