ტურინის „იუვენტუსი“ მზადაა ფედერიკო კიეზა გაყიდოს. იტალიური მედიის ცნობით, იტალიელი შემტევი მასიმილიანო ალეგრის გეგმებში არ შედის, რომელიც წარუმატებელი სეზონის მიუხედავად, თანამდებობიდან არ გაათავისუფლეს.

Corriere Dello Sport-ის ცნობით, ტურინელები მზად არიან კიეზა 30-35 მილიონი ევროს სანაცვლოდ გაყიდონ. ეს მაშინ, როცა 3 წლის წინ „ფიორენტინას“ მის სანაცვლოდ 60 მილიონი ევრო გადაუხადეს. მას მერე, კიეზამ პროგრესი განიცადა, ევროპის ჩემპიონი გახდა ერთ-ერთი მთავარი გმირის რანგში, მაგრამ, როგორც ჩანს, „იუვეს“ სამწვრთნელო შტაბისთვის ეს საკმარისი არაა.

მძიმე ტრავმის შემდეგ კიეზა მოედანზე გასული წლის ბოლოს დაბრუნდა და სეზონი 33 მატჩში 4 გოლით და 6 საგოლე პასით დაასრულა, ხოლო 2020 წლიდან დღემდე შავ-თეთრი მაისურით 94 შეხვედრაში თავი 22 გოლით გამოიჩინა.

ფედერიკოს „იუვესთან“ კონტრაქტი 2025 წლამდე აკავშირებს. ფეხბურთელით „ლივერპული“, "ბაიერნი", "მანჩესტერი" და „ნიუკასლი“ ინტერესდებიან.