გერმანიის ბუნდესლიგაში ანტირეკორდი დამყარდა - მიმდინარე სეზონის საუკეთესო ბომბარდირი „ლაიფციგის“ ფორვარდი კრისტოფერ ნკუნკუ მხოლოდ 16 გოლის გატანით გახდა. ფრანგ ფეხბურთელს საამისოდ 25 მატჩის გამართვა დასჭირდა.

გოლების იგივე რაოდენობა დააგროვა ბრემენის „ვერდერის“ მოთამაშე ნიკლას ფიულკრუგმაც, თუმცა მან ნკუნკუზე სამი მატჩით მეტი ჩაატარა.

აქამდე, გერმანიის ჩემპიონატის ოქროს ბუცი ზედიზედ ხუთჯერ მოიგო რობერტ ლევანდოვსკიმ - 2017/18 წლების სეზონში მან 29 გოლი გაიტანა, შემდეგ კი, 22, 34, 40 და 35.

საერთოდაც, 16 გოლი ყველაზე ცუდი მაჩვენებლია ბუნდესლიგის ისტორიაში. მანამდე ყველაზე უარესი შედეგები დაფიქსირდა 1988/89 და 1995/96 წლების სეზონში, როდესაც ვოლფარტმა (ბაიერნი), ალოფსმა (კიოლნი) და ბობიჩმა (შტუტგარტი) 17-17 გოლი მიითვალეს.

შეგახსენებთ, რომ ამ მხრივ მიმდინარე სეზონის ტოპ-5 ჩემპიონატის საუკეთესო მაჩვენებელი ერლინგ ჰოლანდს ეკუთვნის. ნორვეგიელმა თავის პირველივე პრემიერლიგური სეზონის 35 მატჩში 36 გოლი გაიტანა.