გიორგი მამარდაშვილი ლა ლიგის 34-ე ტურის საუკეთესო მეკარედ დასახელდა. ქართველი კარის დარაჯი უშუალოდ ლა ლიგამ გამოარჩია.
„ვალენსიამ“ ვიგოს „სელტა“ სტუმრად 2:1 დაამარცხა, რაშიც მამარდაშვილმა წვლილი 5 მოგერიებით შეიტანა. ეს კი ესპანეთის ჩემპიონატის ვებგვერდმა დაუფასა. აღსანიშნავია, რომ გიორგი მიმდინარე სეზონში მეორედ დასახელდა ტურის საუკეთესო მეკარედ. პირველად ეს მე-20 ტურში მოხდა, სტუმრად „ჟირონასთან“ მატჩში.
აქვე გეტყვით, რომ 22 წლის ქართველი ფეხბურთელი ლა ლიგის ტურის საუკეთესო მეკარედ ლა ლიგამ გასულ სეზონშიც ორჯერ დაასახელა (პირველ და 35-ე ტურებში).
შეგახსენებთ, გიორგი მამარდაშვილმა ესპანეთის ჩემპიონატის მიმდინარე სეზონში 34 შეხვედრაში 41 გოლი გაუშვა და კარი მშრალად 6-ჯერ შეინახა. „ვალენსია“ მომდევნო ტურში 21 მაისს, მადრიდის „რეალს“ უმასპინძლებს.
