პოლონეთის ექსტრაკლასას 32-ე ტურში პოზნანის „ლეხმა“ სტუმრად წინა ტურში გაჩემპიონებული „რაკუვი“ 2:0 დაამარცხა, რაშიც ნიკა კვეკვესკირმა დიდი წვლილი შეიტანა.

ქართველმა ფეხბურთელმა 32-ე წუთზე ფილიპ მარჩვინსკის საგოლე პასი გაუკეთა, ხოლო 68-ე წუთზე პენალტი მოიპოვა, რომელიც გოლად კრისტოფერ ველდემ აქცია და საბოლოო ანგარიში დააფიქსირა. სხვათა შორის, მსაჯმა ჯერ სიმულაციისთვის კვეკვესკირი გააფრთხილა, მაგრამ VAR-ზე მომენტი გადაამოწმა და გადაწყვეტილება შეცვალა, პენალტი დანიშნა.

ქართველ ნახევარმცველს მიმდინარე სეზონში ყველა ტურნირზე 48 მატჩში 3 გოლი და 3 საგოლე პასი აქვს მითვლილი, მან 81-ე წუთამდე ითამაშა, ხოლო გიორგი წიტაიშვილი სათადარიგო სკამზე იყო.

„ლეხი“ 55 ქულით მეოთხე ადგილზეა და მომდევნო ტურში 19 მაისს, სტუმრად „კორონას“ დაუპირისპირდება.