მადრიდის „რეალის“ მთავარმა მწვრთნელმა კარლო ანჩელოტიმ „მანჩესტერ სიტისთან“ მატჩამდე პრესკონფერენცია გამართა. როგორც იტალიელმა სპეციალისტმა განაცხადა, მეტოქე შარშანდელზე ძლიერი და სრულყოფილი გუნდია, მაგრამ ეცდებიან, რომ მათი შეჩერება მოახერხონ.
„მოგება გვინდა, მაგრამ კარგად თამაშიც, რადგან მთავარი არა მხოლოდ შედეგი, არამედ ისიც არის, როგორ თამაშობ და პრობლემების თავიდან აცილებას ახერხებ თუ არა. მოდრიჩი კარგადაა, თამაში შეუძლია, უფრო სწორად, ის ითამაშებს.
ჰოლანდი ძალიან სახიფათოა, მაგრამ არა მარტო ის, არამედ მთლიანად „სიტი“, რომელიც სრულყოფილი გუნდია. ეს არის გუნდი, რომელიც ფეხბურთს ძალიან კარგად თამაშობს. ვმუშაობთ საიმისოდ, რომ შევაჩეროთ გუნდი, რომელიც შეუჩერებელი ჩანს. რამდენიმე ვარიანტი გვაქვს. კარგ ფორმაში ვართ, გასული სეზონის დონეზე.
„სიტი“ შარშანდელთან შედარებით უფრო სრულყოფილი გუნდია. გაბრიელ ჟეზუში ჰყავდათ, რომელიც ძალიან სახიფათო იყო, მაგრამ ჰოლანდისგან განსხვავებული სტილის მოთამაშე. ახლა მათ გრძელი პასების გამოყენებაც შეუძლიათ, მაგრამ სათამაშო სტილი იგივე აქვთ. შარშანდელ მატჩებთან შედარებით ერთადერთი, რაც იცვლება, ისაა, რომ გასულ სეზონში ჩემპიონთა ლიგა მოვიგეთ. ის გაიმარჯვებს, ვინც უფრო ძლიერი იქნება და თავის თვისებებს უკეთ გამოიყენებს.
ვინისიუსი და როდრიგო? მათი პროგრესი ძალიან მნიშვნელოვანია ამ გუნდის მომავლისთვის, ასევე დღევანდელი თამაშისთვისაც“, - განაცხადა ანჩელოტიმ.
შეგახსენებთ, რომ მადრიდის „რეალმა“ „მანჩესტერ სიტი“ გასულ სეზონში ნახევარფინალში დაამარცხა. ესპანელებმა ინგლისური გუნდი ამ ეტაპიდან 2015-2016 წლების სეზონშიც გააგდეს.
