იტალიელმა ჟურნალისტმა ანტონიო კორბომ „მილანთან“ „ნაპოლის“ თამაში შეაფასა. მისი აზრით, როდესაც მეტოქეები ხვიჩა კვარაცხელიას გაჩერებას ახერხებენ, მაშინ ლუჩანო სპალეტის გუნდიც იბლოკება.

„როცა უამრავ შეცდომას უშვებ „მილანის“ დონის გუნდთან, ყველაფერი ისე აღარ მიდის, როგორც გინდოდა. გუნდური თამაში ძალიან ცუდი და მწირი იყო. ამ გუნდს ალბათ აქვს ნაკლი, კერძოდ, ორი ნაკლი: პირველი ის, რომ შეცვლაზე შესულ ფეხბურთელებს ცოტა დრო აქვთ, რადგან შეცვლები დაგვიანებულია, მეორე ის, რომ კვარაცხელიას თუ გააჩერებ, მთელი გუნდიც ჩერდება.

შეიძლებოდა მარიო რუის შეცვლა, მაგრამ მისი შემცვლელი სკამზე არ იყო, პორტუგალიელი კი მოედანზე ყველაზე ცუდი მოთამაშე იყო. „ნაპოლი“ იმდენად ჩავარდა, რომ ძნელია კომენტარის გაკეთებაც“, - თქვა კორბომ.

შეგახსენებთ, „ნაპოლი“ "მილანთან" წაგების (0:4) მიუხედავად 71 ქულით ლიდერია. „აძური“ 16 ქულით უსწრებს უახლოეს მდევარ „ლაციოს“, მომდევნო ტურში კი 7 აპრილს, სტუმრად „ლეჩეს“ შეხვდება. ხვიჩა კვარაცხელიამ მიმდინარე სეზონში ყველა ტურნირზე ჩატარებულ 31 შეხვედრაში 14 გოლი, 14 საგოლე პასი და 4 მოპოვებული პენალტი მიითვალა. „ნაპოლი“ და „მილანი“ 12-18 აპრილს, ჩემპიონთა ლიგის მეოთხედფინალშიც დაუპირისპირდებიან.