„მერსედესის“ ფორმულა 1-ის გუნდის შეფი ტოტო ვოლფი ამბობს, რომ ლუის ჰამილტონს და ჯორჯ რასელს მეექვსე ეტაპამდე მოუწევთ ლოდინი, სანამ მათ მანქანებს დიდი განახლებები ჩაუტარდება. მეექვსე რბოლას იტალიის იმოლას ტრეკი უმასპინძლებს.

ორი რბოლის შემდეგ, გერმანულ გუნდს კონსტრუქტორებში მესამე ადგილი უკავია. მას იმდენივე ქულა აქვს, რამდენიც „ასტონ მარტინს“. ორივე კი ლიდერ „რედ ბულს“ 49 ქულით ჩამორჩება.

„წინ დიდი ნაბიჯებით მივიწევთ. სიახლეებზე ვმუშაობთ, მაგრამ მათ დასანერგად, ჯერ გატესტვა და დადასტურებაა საჭირო. შემდეგ კი დამზადების ჯერიც მოვა. ამიტომ, იმოლამდე ლოდინი მოგვიწევს. ჩვენ გვინდა, ყველაფერი კარგად გავაკეთოთ. სასწაულს არ ველით. მომდევნო სამ რბოლაში, შედეგების გაუმჯობესება არ გვექნება“, - ამბობს ავსტრიელი.

მელბურნის რბოლის შემდეგ, ოთხკვირიანი შუალედია, რადგნ ჩინეთში რბოლა გაუქმდა. აზერბაიჯანში მეოთხე ეტაპი 30 აპრილს ჩატარდება. 7 მაისს მაიამის რბოლაა, იმოლაში კი რბოლა 21 მაისს გაიმართება.