ნორვეგიის ეროვნული ნაკრების მთავარმა მწვრთნელმა სტალე სოლბაკენმა ევროპის 2024 წლის ჩემპიონატის საკვალიფიკაციო ეტაპზე საქართველოსთან მატჩის შემდეგ პრესკონფერენციაზე ისაუბრა.

„არაფერი სიურპრიზი არ ყოფილა. არ ვფიქრობ, რომ მეორე ტაიმში ინიციატივა დავკარგეთ, უბრალოდ, რამდენჯერმე ბურთი დავკარგეთ და კონტრშეტევები მივიღეთ, საქართველოს კი კონტრშეტევებზე ხარისხიანი ფეხბურთელები ჰყავს. ჩვენ გვქონდა შესანიშნავი საგოლე მომენტები, დაახლოებით 6-7 რეალური შანსი, მეტოქეს კი მხოლოდ 2-3.

საქართველოს ნაკრებისა და განსაკუთრებით მისი შემტევი ფეხბურთელების შესახებ ყველაფერი ვიცით, ისინი ძალიან ხარისხიანი მოთამაშეები არიან. თუმცა, დღეს ასევე გამოვარჩევდი მეკარეს, რომელმაც ძალიან კარგად ითამაშა“, - თქვა სოლბაკენმა.

შეგახსენებთ, რომ საქართველოს ნაკრებს მომდევნო მატჩები ევრო 2024-ის შესარჩევ ციკლში ივნისში ელოდება. ვილი სანიოლის გუნდი 17 ივნისს, კვიპროსს, 3 დღის შემდეგ კი შოტლანდიას დაუპირისპირდება, ორივე შემთხვევაში გასვლაზე.