საქართველოს ეროვნული ნაკრები ევროპის 2024 წლის ჩემპიონატის შესარჩევ ციკლში 28 ნოემბერს ჩაერთვება, როდესაც ნორვეგიის ნაკრებს ბათუმში უმასპინძლებს, თუმცა, საკვალიფიკაციო ეტაპი ხვალ, 23 მარტს დაიწყება.

საკვალიფიკაციო ეტაპზე მონაწილეობას 53 ნაკრები მიიღებს. გამონაკლისია გერმანია, რომელიც ევრო 2024-ის მასპინძელია და ბუნებრივია შესარჩევ ციკლში არ ითამაშებს, ხოლო რუსეთი საკვალიფიკაციო ტურნირში უეფამ არ დაუშვა.

ხსენებული 53 ნაკრები 10 ქვეჯგუფში განაწილდა, საიდანაც 7 ჯგუფი (A, B, C, D, E, F, G) 5-გუნდიანი, ხოლო 3 ჯგუფი (H, I, J) 6-გუნდიანია. ევროპის ჩემპიონატის ფინალურ ეტაპზე თითოეული ჯგუფის პირველ-მეორეადგილოსნები ავტომატურად გავლენ. ჯგუფში სხვა პოზიციები არანაირი შანსის მომტანი არ იქნება (არც პლეი-ოფის). აღსანიშნავია, რომ წილისყრისას ერთა ლიგის კალათაში განთესილი ოთხი გუნდი A, B, C და D ჯგუფებში განაწილდნენ, ხოლო პირველი კალათის წევრები E, F, G, H, I და J ჯგუფებში.

საკვალიფიკაციო ეტაპიდან ევროპის ჩემპიონატის საგზურს 20 ნაკრები მოიპოვებს (როგორც უკვე ვთქვით, 10 ჯგუფის 2-2 საუკეთესო გუნდი, სულ 20), რომელსაც მასპინძელი გერმანია შეუერთდება. დარჩება კიდევ სამი თავისუფალი საგზური, რომელიც 2024 წლის მარტში ერთა ლიგის პლეი-ოფში გათამაშდება (A, B და C ლიგიდან თითო-თითო). სხვათა შორის, საქართველოს ნაკრებმა ევროპის ჩემპიონატზე გასვლა ჩვეულებრივი შესარჩევი ციკლიდან რომ მოახერხოს, ერთა ლიგის პლეი-ოფში მონაწილეობას არ მიიღებს.

ევროპის ჩემპიონატის საკვალიფიკაციო ეტაპის განრიგი ცხადია უკვე ცნობილია. ის 23 მარტში დაიწყება და მიმდინარე წლის ნოემბერში დასრულდება. ერთა ლიგის პლეი-ოფი კი როგორც ვთქვით, 2024 წლის მარტში შედგება.

საქართველოს ნაკრების კალენდარი ევრო 2024-ის შესარჩევ ეტაპზე ასეთია:

28 მარტი: საქართველო - ნორვეგია

17 ივნისი: კვიპროსი - საქართველო

20 ივნისი: შოტლანდია - საქართველო

8 სექტემბერი: საქართველო - ესპანეთი

11 სექტემბერი: ნორვეგია - საქართველო

15 ოქტომბერი: საქართველო - კვიპროსი

16 ნოემბერი: საქართველო - შოტლანდია

19 ნოემბერი: ესპანეთი - საქართველო

23 მარტს საკვალიფიკაციო ეტაპი შემდეგი მატჩებით დაიწყება, რომელთანაც ერთი გამორჩეულია: იტალია - ინგლისი. ბედის ირონიაა, რომ ბოლო ევროპის ჩემპიონატის ფინალისტები, ჩემპიონი იტალია და ვიცე-ჩემპიონი ინგლისი ერთ ჯგუფში მოხვდნენ და თან, პირველივე ტურში მოუწიათ დაპირისპირება. ოღონდ, თუ მაშინ ფინალი ლონდონში იყო, ახლა ნეაპოლში შეხვდებიან. ისინი ადვილ ჯგუფში სულაც არ არიან, უკრაინის, ჩრდილოეთ მაკედონიისა და მალტას კონკურენციის დაძლევა მოუწევთ.

23 მარტის მატჩები

ყაზახეთი - სლოვენია

ბოსნია - ისლანდია

დანია - ფინეთი

იტალია - ინგლისი

ჩრდ. მაკედონია - მალტა

პორტუგალია - ლიხტანშტაინი

სან მარინო - ჩრდ. ირლანდია

სლოვაკეთი - ლუქსემბურგი

ევროპის 2024 წლის ჩემპიონატის შესარჩევი ეტაპის ყველა ჯგუფი: