კონფერენს ლიგის მერვედფინალში პოზნანის „ლეხმა“ სტუმრად „დიურგარდენი“ 3:0 დაამარცხა, ორი მატჩის ჯამში კი 5:0 აჯობა და მეოთხედფინალში გავიდა.

შვედეთში გამართულ შეხვედრაში ნიკა კვეკვესკირმა გოლი გაიტანა და საგოლე პასი გააკეთა. ნიკა თამაშში 67-ე წუთზე ჩაერთო, 91-ე წუთზე გაიტანა, ხოლო ერთი წუთის მიხალ შკორაშს საგოლე გადაცემა გაუკეთა. ეს მისი ზედიზედ მეორე გოლია, რადგან კვირას, პოლონეთის ჩემპიონატშიც შეძლო თავის გამოჩენა.

არ უთამაშია გიორგი წიტაიშვილს, რომელიც განაცხადში არ იყო და შვედეთში საერთოდ არ წაიყვანეს. „ლეხი“ მეოთხედფინალში გავიდა და ტიტულისთვის ბრძოლას აგრძელებს. სხვათა შორის, "ლეხი" ევროთასის მეოთხედფინალში ისტორიაში პირველად გავიდა.

ასპარეზობას გამოეთიშა ბრატისლავის „სლოვანი“, სადაც ქართველები თამაშობენ. სლოვაკური გუნდი შვეიცარიელებს ჯგუფშიც შეხვდა, სადაც შინ დაუზავდა (3:3), ხოლო სტუმრად აჯობა (2:0), მაგრამ წილისყრამ ისე ინება, რომ ისინი მერვედფინალშიც დაწყვილდნენ.

ერთი კვირის წინ შვეიცარიაში ფრე დაფიქსირდა (2:2), ხოლო ბრატისლავაში ვლადიმირ ვაისის გუნდმა ტაიმი 2:0 მოიგო და დიდი ნაბიჯი გადადგა მეოთხედფინალისკენ. თუმცა, მეორე ტაიმში ორი გოლი გაუშვა, მათ შორის, მეორე 93-ე წუთზე და საბოლოოდ ყველაფერი პენალტების სერიამ გადაწყვიტა, სადაც „ბაზელმა“ 4:1 იმარჯვა და მეოთხედფინალში დრამატული მოგებით გავიდა. გურამ კაშიამ და ჯაბა კანკავამ 120-120 წუთი ითამაშეს, ხოლო გიორგი ჩაკვეტაძე 72-ე წუთზე შეცვალეს. ამრიგად, „სლოვანმა“ ევროთასებზე მიმდინარე სეზონი დაასრულა.

კონფერენს ლიგის მეოთხედფინალში ასევე გასულები არიან „გენტი“ და „ფიორენტინა“.