ლეგენდარულმა ფეხბურთელმა მარკო ვან ბასტენმა „ატალანტასთან“ ხვიჩა კვარაცხელიას საოცარ გოლზე ისაუბრა. მან ნიდერლანდური ტელეკომპანიის, Ziggo Sport-ის ეთერში „ნაპოლი“ – „ატალანტას“ მატჩი გაარჩია და განსაკუთრებული ყურადღება ხვიჩას გოლს დაუთმო.

ვან ბასტენმა თქვა, რომ კვარაცხელია 8 მეტოქის გარემოცვაში იყო და თუ მომენტს მხოლოდ ფოტოზე შეხედავ, ვერავინ დაიჯერებს, რომ იმ მომენტში მან გოლი გაიტანა.

„სურათს თუ შეხედავთ, თქვენ უბრალოდ დაინახავთ რვა ადამიანს ერთის წინააღმდეგ, შემდეგ კი იფიქრებთ: შეუძლებელია სიმართლე იყოს, რომ ის აქ გოლს გაიტანს. ძირითადად, ის მხოლოდ ერთ კაცს ეთამაშება თავისი მოქმედებებით, მაგრამ მის გარშემო სულ 8 ფეხბურთელია... ეს ფანტასტიკური გოლია! მსუბუქად თამაშობს, ადვილად მოძრაობს მარჯვნივ და მარცხნივ, თანაც სწრაფად. მას აქვს თავისუფლება, კლასი და კარგად იცის, თუ სად და როდის რა გააკეთოს“, - თქვა ვან ბასტენმა.

შეგახსენებთ, რომ ხვიჩა კვარაცხელიას სერია A-ს მიმდინარე სეზონში 22 შეხვედრაში 11 გოლი აქვს გატანილი, 9-ჯერ საგოლე პასი გააკეთა და 2-ჯერ პენალტი მოიპოვა. ჩემპიონთა ლიგის შედეგებსაც თუ დავუმატებთ, კვარას მაჩვენებელი ცხადია უფრო შთამბეჭდავია: 28 მატჩი, 13 გოლი, 13 საგოლე პასი და 3 მოპოვებული პენალტი. სხვათა შორის, სერია A-ში 11 გოლით კვარაცხელია ლევან მჭედლიძეს დაეწია, ქართველი ფეხბურთელებიდან უფრო მეტი გოლი იტალიის ჩემპიონატში კახა კალაძეს აქვს გატანილი, მაგრამ ხვიჩა დიდი ალბათობით, მას ამ სეზონშივე გადაასწრებს.