კრისტალბეთ ეროვნული ლიგის მე-3 ტური უხვგოლიანი დაპირისპირებით გაიხსნა. ილია კოკაიას სახელობის ზესტაფონის ბაზაზე გამართულ მატჩში „დინამო თბილისმა“ „გაგრა“ 3:5 დაამარცხა.



შეხვედრის პირველი გოლი მე-9 წუთზე ულად ომარმა გაიტანა. ნახევარ საათში „გაგრამ“ მატეუშ მარკონდელეს გოლით მოახერხა ანგარიშის გათანაბრება, თუმცა ტაიმის ბოლოს, უსმანე კამარამ მოქმედი ჩემპიონები კვლავ დააწინაურა და პირველი ტაიმი „დინამოს“ გამარჯვებით, 1:2 დასრულდა.

მეორე ტაიმი „დინამომ“ ძალიან აქტიურად დაიწყო და 10-წუთიან მონაკვეთში მეტოქეს 3 უპასუხო გოლი გაუტანა. თავი ზორან მარუშიჩმა, 17 წლის გაბრიელ სიგუამ და უსმანე კამარამ გამოიჩინეს.

ამის შემდგომ „დინამო“ შედარებით მოეშვა, რის შედეგადაც თეიმურაზ შონიამ 74-ე და 82-ე წუთებზე დუბლი შეასრულა. საბოლოოდ, მატჩი 3:5 დასრულდა.

„დინამო თბილისს“ 3 ტურის შემდგომ 9 ქულა აქვს და ჩემპიონატს ლიდერობს. „გაგრას“ მეორე ტურში ნათამაშები ფრის წყალობით 1 ქულა აქვს და ბოლო ადგილზე იმყოფება. მომდევნო მატჩს „დინამო“ 13 მარტს, „სამგურალის“ წინააღმდეგ, „გაგრა“ კი 12 მარტს „ტორპედოს“ წინააღმდეგ გამართავს.

ეროვნული ლიგის მესამე ტურის ორი მატჩი, „სამგურალი“ - „თელავი“ და „სამტრედია“ – „ტორპედო“ ამჟამად მიმდინარეობს. რაც შეეხება დარჩენილ ორ მატჩს, 17:00 საათზე „საბურთალო“ – „შუქურას“, „დილა“ კი „დინამო ბათუმს“ დაუპირისპირდება.