„კრაკოვიას“ ფეხბურთელი ოთარ კაკაბაძე პოლონეთის ჩემპიონატის 23-ე ტურის სიმბოლურ ნაკრებში მოხვდა. ქართველი მცველი ექსტრაკლასას ვებგვერდმა გამოარჩია.

ოთარმა ვროცლავის „სლასკთან" შეუცვლელად ითამაშა და საგოლე პასი მიითვალა. სწორედ მისი გადაცემით გაიტანა გოლი მატეუშ ბოხნაკმა, რომელმაც 54-ე წუთზე საბოლოო ანგარიში დააფიქსირა (1:1). კაკაბაძე სხვა მომენტებშიც აქტიური იყო.

აღსანიშნავია, რომ საქართველოს ნაკრების მარჯვენა მცველმა ეს შეხვედრა საპირისპირო ფლანგზე ჩაატარა - მარცხენა მცველად ითამაშა და ძალიან კარგადაც. გავიხსენოთ, რომ ოთარს ვილი სანიოლი საქართველოს ნაკრებში 3-4-2-1 სქემაში უმეტესწილად ცენტრალურ მცველად ათამაშებს.

კაკაბაძე პოლონეთის ჩემპიონატის ბოლო სამ ტურში სიმბოლურ ნაკრებში მეორედ, ხოლო სეზონში მეოთხედ მოხვდა. მიმდინარე სეზონში 27 წლის ფეხბურთელს ყველა ტურნირზე ჩატარებულ 20 მატჩში 2 გოლი და 4 საგოლე პასი აქვს მითვლილი, „კრაკოვია“ კი 33 ქულით მეექვსე ადგილზეა.