უეფას ჩემპიონთა ლიგის სოციალურ ქსელში 2022/2023 წლების სეზონის ტურნირის ფინალის ოფიციალური ბურთი წარადგინეს. შეგახსენებთ, რომ ჩემპიონთა ლიგის ამ გათამაშების გადამწყვეტი მატჩი თურქეთში გაიმართება, შესაბამისად, ბურთის დიზაინის საფუძვლად თურქეთის ეროვნული მოტივები აიღეს.

ბურთის არაჩვეულებრივი დიზაინი სოციალურ ქსელებში გულშემატკივრებმა დადებითად შეაფასეს. მომხმარებლებმა აღფრთოვანებული კომენტარები დატოვეს ფოტოს ქვეშ: „ჩემპიონთა ლიგის ყველა დროის ერთ-ერთი საუკეთესო ბურთი!", „თურქული კულტურის წარმოუდგენელი ასახვა" და ა.შ.

თუმცა იყვნენ ისეთებიც, ვინც ბურთის დიზაინს აკრიტიკებდა. ხშირად შეხვდებით კომენტარებს, რომ ბურთი უფრო ირანულ-სპარსულ სტილშია გაკეთებული, ვიდრე თურქულში.

შეგახსენებთ, 2022/2023 წლების სეზონის ჩემპიონთა ლიგის ფინალი სტამბოლში, ათათურქის ოლიმპიურ სტადიონზე გაიმართება. მატჩი 2023 წლის 10 ივნისს არის დაგეგმილი.