რუმინეთთან რაგბი ევროპის ჩემპიონატის ნახევარფინალური მატჩის წინ, ბორჯღალოსნების გაფართოებულ შემადგენლობაში ერთი იძულებითი ცვლილებაა. 33-კაციან რაზმს ტრავმის გამო მირიან მოდებაძე გამოაკლდა, მის ნაცვლად კი შეკრებაზე 18 წლის ლუკა ხორბალაძე შევიდა.

ლუკა ხორბალაძე ქართული რაგბის ქომაგმა გასული წლის ოქტომბერში, საქართველოში გამართული 18-წლამდელთა რაგბი ევროპის ჩემპიონატის მსვლელობისას გაიცნო. ფულბეკისა და ფრთის პოზიციაზე მოთამაშე მორაგბემ არაერთი დასამახსოვრებელი მომენტი შექმნა, გაიტანა ლამაზი ლელოები, მათ შორის ორი ფინალში პორტუგალიასთან. ის ასევე მაღალი პროცენტული სიზუსტით ასრულებდა გარდასახვებს.

რაც შეეხება მოდებაძეს, მას ტრავმა გაუმიზეზდა, რის გამო რუმინეთთან მატჩის გარდა, 19 მარტს გასამართ ფინალურ შეხვედრასაც გამოტოვებს.

„როგორც ჩანს, მირიანმა კლუბში მცირე ტრავმით ითამაშა, დაზიანება გაიმიზეზა და სავარაუდოდ, 4-იდან 6 კვირამდე გაუცდება, არადა ამის თავიდან აცილება შეიძლებოდა“ – განაცხადა ბორჯღალოსნების მთავარმა მწვრთნელმა ლევან მაისაშვილმა. ხორბალაძესთან დაკავშირებით ის ამბობს:

„ლუკა ხორბალაძემ 18-წლამდელთა ევროპის ჩემპიონატი ბრწყინვალედ ჩაატარა და მას შემდეგ ვაკვირდებით. ლუკას ფანტასტიური მონაცემები აქვს, შეუძლია რამდენიმე პოზიცია დაფაროს და კარშიც კარგად ურტყამს. 20-წლამდელთა მსოფლიო ჩემპიონატის წინა მოსამზადებელი ეტაპის დაწყებამდე, მოგვეცა შესაძლებლობა ის ჩვენი გუნდის შეკრებაზე გვეხილა. მასზე პატარა იყო დავით ნინიაშვილი, როდესაც პირველად შემოვიყვანეთ შეკრებაზე და ირლანდიასთან დებიუტიც ჰქონდა. ხორბალაძე საინტერესო მოთამაშეა და ვფიქრობ ამ ბიჭს საკმაოდ დიდი მომავალი აქვს“.

ბორჯღალოსნების მთავარმა მწვრთნელმა ბექა გორგაძის რეაბილიტაციასთან დაკავშირებითაც ისაუბრა:

„ის კლუბში აგრძელებს რეაბილიტაციას, თუმცა ჯერ გამოჯანმრთელებული არ არის და შესაბამისად, ვერც გუნდში ითამაშებს. დიდი ალბათობით ბექა 19 მარტისთვის მწყობრში იქნება“.

RUGBY.GE