საქართველოს ნაკრების მწვრთნელმა ილიას ზუროსმა მსოფლიოს ჩემპიონატის საგზურის მოპოვების შემდეგ ისაუბრა. მისმა გუნდმა ისლანდიასთან მარცხის მიუხედავად (77:80) პლანეტის პირველობაზე გასვლა ისტორიაში პირველად მოახერხა.

„პირველ რიგში მინდა ვთქვა, რომ ეს ყველაზე ბედნიერი დღეა ჩემს საკალათბურთო კარიერაში. ძალიან ვამაყობ ჩემი კალათბურთელებით, გუნდით, ისტორია დავწერეთ, მსოფლიოს ჩემპიონატზე გავედით. არ დაგავიწყდეთ, რომ პირველ საკვალიფიკაციო ეტაპზე ჩვენ 2 მოგება დაგვაკლეს. გულით ვითამაშეთ. დღეს წავაგეთ, მაგრამ ბედნიერები ვართ, მთელი ქვეყანა გავაბედნიერეთ. მინდა დიდი მადლობა გადავუხადო გულშემატკივრებს, დარბაზში დაუჯერებელი ატმოსფერო იყო, როცა ანგარიშში ჩამოვრჩით, ისინი დაგვეხმარნენ.

განსაკუთრებული მადლობა ფედერაციას, რადგან ძალიან დაგვეხმარნენ. თორნიკე შენგელიამ ნიდერლანდებთან მატჩის შემდეგ იტალიაში ითამაშა, შემდეგ დაბრუნდა და აქ ითამაშა. ასეთი რამ ჩემს ცხოვრებაში არ მინახავს, ის ყველაზე დიდი პატრიოტია. გიორგი შერმადინმა 3 თამაში ესპანეთის თასზე ჩაატარა, მერე აქ ჩამოვიდა, ძალიან ბევრი წუთი ითამაშა და ესეც საოცარია. ყველა კალათბურთელს მადლობა, განსაკუთრებით ცინცაძეს, რომელიც უკვე ვეტერანია და ბევრი ტრავმა აქვს გადატანილი, მაგრამ ძალიან დაგვეხმარა.

ჩემთვის ეს განსაკუთრებული მომენტია, რადგან მთელი ქვეყანა გავაბედნიერეთ. მადლობას ვუხდი ჩემს ცოლს და შვილებს, რადგან ეს სამუშაო ძალიან რთულია, ისინი რთულ მომენტებში მხარს მიჭერდნენ.

ესპანეთთან მოგება გარდამტეხი იყო, რადგან სხვა გუნდებმა მისი დამარცხება ვერ შეძლეს. ასევე მნიშვნელოვანი იყო ისლანდიასთან სტუმრად მოგება. ძალიან ბედნიერი და ამაყი ვარ. კიდევ ერთხელ ვიმეორებ, რთული გზა გავიარეთ საიმისოდ, რომ მსოფლიოს ჩემპიონატზე გავსულიყავით. დღეს ძალიან დიდი წნეხის ქვეშ ვითამაშეთ.

თედ მაკფადენი უკვე ჩვენიანია. მას ჰქონდა თამაშში კარგი და ცუდი მომენტები, მაგრამ ეს ყველა კალათბურთელს ახასიათებს, რაც მთავარია გულით ითამაშა, ძალიან დაგვეხმარა. ის ყოველთვის ბოლომდე იხარჯება საქართველოს ნაკრებისთვის, უყვარს ეს გუნდი და თავს უძღვნის. მადლობელი ვართ მისი, ახლა ვტკბებით ამ მომენტით, ეს ძალიან მნიშვნელოვანია. იმედი მაქვს, რომ ეს საკვალიფიკაციო ეტაპი კალათბურთს ბიძგს მისცემს, უფრო მეტი ბავშვი ითამაშებს კალათბურთს, უფრო მეტი დარბაზი გვექნება. მთელი გულით მადლობა ქართველ ხალხს“,

შეგახსენებთ, რომ საქართველოს ნაკრები მსოფლიოს ჩემპიონატზე ისტორიაში პირველად გავიდა. მსოფლიოს ჩემპიონატი მიმდინარე წლის 25 აგვისტოდან 10 სექტემბრის ჩათვლით იაპონიაში, ინდონეზიასა და ფილიპინებში ჩატარდება.