ევროპა ლიგის პლეი-ოფში „ბარსელონა“ „მანჩესტერთან“ დამარცხდა და მერვედფინალს მიღმა დარჩა.

ევროპული ფეხბურთის გრანდების პირველი დუელი ერთი კვირის წინ ესპანეთში ფრედ დასრულდა, ინგლისში კი მასპინძლებმა მოიგეს. არადა, თავიდან „ბარსელონა“ იგებდა რობერტ ლევანდოვსკის პენალტით, მაგრამ მეორე ნახევარში მანჩესტერელებმა სიტუაცია შეცვალეს, რაც ბრაზილიელების დამსახურებაა, რადგან ანგარიში ფრედმა გაათანაბრა, მომდევნო ეტაპზე გამსვლელი გოლის ავტორი კი ანტონია. შედეგად, „წითელმა ეშმაკებმა“ „ბარსას“ 2:1 აჯობეს. სხვათა შორის, „ბარსელონა“ ევროპა ლიგას უსახელოდ ზედიზედ მეორედ დაემშვიდობა.

მერვედფინალში გავიდა „რომაც“, რომელმაც „ზალცბურგთან“ სტუმრად 0:1 წაგების მიუხედავად, შინ გამარჯვება მოახერხა - 2:0. პირველი ტაიმის მიწურულს ანდრეა ბელოტიმ და პაულო დიბალამ გაიტანეს. ჟოზე მოურინიოს გუნდმა ეს უპირატესობა შეინარჩუნა და მერვედფინალშია.

მომდევნო ეტაპზე გავიდა ბუნდესლიგის ლიდერი „უნიონ ბერლინი“, რომელმაც შინ ამსტერდამის „აიაქსს“ 3:1 აჯობა. პირველი მატჩი ვინაიდან უგოლოდ იყო დასრულებული, ნიდერლანდური გრანდი გავარდა, „უნიონი“ კი მომდევნო ეტაპზეა. მერვედფინალში გავიდა "შახტარიც", რომელმაც "რენთან" 1:2 წააგო, მაგრამ პენალტების სერიაში 5:4 იმარჯვა. აღსანიშნავია, რომ უკრაინული გუნდის ევროპა ლიგის განაცხადში გიორგი გოჩოლეიშვილი არ არის.

„რომა“ – „ზალცბურგი“ 2:0 (2:0)

გოლები: 1:0 ბელოტი (33), 2:0 დიბალა (40)

„მანჩესტერი“ – „ბარსელონა“ 2:1 (0:1)

გოლები: 0:1 ლევანდოვსკი (18, პენ), 1:1 ფრედი (47), 2:1 ანტონი (73)

„უნიონი“ – „აიაქსი“ 3:1 (2:0)

გოლები: 1:0 კნოხე (20), 2:0 იურანოვიჩი (44), 2:1 კუდუსი (47), 3:1 დოეხი (50)

„რენი“ – „შახტარი“ 2:1 პენ: 4:5 (0:0)

გოლები: 1:0 ტოკო ეკამბი (52), 2:0 სალაჰი (106), 2:1 ბელოჩიანი (119, ა.გ)

ევროპა ლიგის მერვედფინალში გასულ 8 გუნდი იმ 8 გუნდს შეუერთდა, რომლებმაც ეს საგზური ჯერ კიდევ შემოდგომაზე მოიპოვეს ჯგუფში პირველი ადგილის დაკავების შედეგად.

პირველადგილოსნები წილისყრისას განთესილები არიან და ერთმანეთს ვერ შეხვდებიან, ხოლო პლეი-ოფიდან გადასული გუნდები განუთესავები არიან, რომლებიც მერვედფინალში პირველ მატჩს შინ ჩაატარებენ.

განთესილი გუნდები (ისინი ერთმანეთს ვერ შეხვდებიან და პირველ მატჩს სტუმრად ჩაატარებენ)

„არსენალი“ (ინგლისი), „ბეტისი“ (ესპანეთი), „ფენერბაჰჩე“ (თურქეთი), „ფერენცვაროში“ (უნგრეთი), „ფეიენოორდი“ (ნიდერლანდები), „ფრაიბურგი“ (გერმანია), „სოსიედადი“ (ესპანეთი), „უნიონ სენ-ჟილუა“ (ბელგია)

განუთესავი გუნდები (ისინი ერთმანეთს ვერ შეხვდებიან და პირველ მატჩს შინ ჩაატარებენ)

„იუვენტუსი“ (ტალია), „ლევერკუზენი“ (გერმანია), „სევილია“ (ესპანეთი), „სპორტინგი“ (პორტუგალია), „უნიონი“ (გერმანია), „მანჩესტერი“ (ინგლისი), „რომა“ (იტალია), "შახტარი" (უკრაინა)

ევროპა ლიგის მერვედფინალის წილისყრა 24 თებერვალს, თბილისის დროით 15:00 საათზე გაიმართება. აქვე გეტყვით, რომ ერთი ქვეყნის გუნდები ერთმანეთს ამ ეტაპზე ვერ შეხვდებიან.