თორნიკე შენგელიამ იტალიის თასი ვერ მოიგო. „ვირტუს ბოლონია“ ფინალში „ბრეშასთან“ საკმაოდ მოულოდნელად 76:84 დამარცხდა და ტიტულის გარეშე დარჩა.

გარდამტეხი მეორე პერიოდი გამოდგა, რომელიც სერჯო სკარიოლოს გუნდმა 9 ქულით წააგო და ამ ჩამორჩენის გაბათილება მეორე ტაიმში ვეღარ მოახერხა.

შენგელიამ ფინალურ შეხვედრაში 28 წუთი ითამაშა, ხსენებულ დროში კი 12 ქულა, 4 მოხსნა, 5 პასი და 1 ჩაჭრა მიითვალა. საქართველოს ნაკრების კაპიტანმა 8-დან 4 ორქულიანი და 5-დან 4 საჯარიმო ჩააგდო, 1 სამქულიანი კი ააცილა.

თორნიკე ახლა ნიდერლანდებში საქართველოს ნაკრებს შეუერთდება, რომელსაც წინ მსოფლიოს ჩემპიონატის საკვალიფიკაციო ეტაპის გადამწყვეტი მატჩები ელოდება.