სუპერლიგის პროექტი ისევ გააქტიურდა და დღეს ახალი გეგმა წარმოადგინეს, რომელიც 10 პრინციპისგან შედგება.

როგორც ცნობილი გახდა, სუპერლიგის ბოსებმა ბოლო პერიოდში 50-მდე გუნდთან ისაუბრეს და უმეტესობა თანახმაა, რომ ტურნირში ჩაერთოს. მათი მიზანია, რომ სუპერლიგის ახალ ფორმატში 60-80 გუნდი მონაწილეობდეს. ჯერჯერობით, ახალი სუპერლიგის ფორმატი დაზუსტებული არაა, მაგრამ ცნობილია, რომ თითოეულ გუნდს სეზონში მინიმუმ 14 მატჩის ჩატარება მოუწევს.

შეიქმნება რამდენიმე დივიზიონი, რის შედეგადაც ტურნირში აღზევება-დაქვეითების ფორმატი იმუშავებს. აღსანიშნავია, შეჯიბრში ადგილი გარანტირებული არავის ექნება და მასში მოხვედრა შიდა ჩემპიონატების შედეგების მიხედვით იქნება შესაძლებელი. 2021 წელს წარმოდგენილი პროექტისგან სხვაობაც ეს არის - მაშინ სუპერლიგა დახურული ტურნირის ფორმატით წარმოადგინეს.

სუპერლიგის გენერალურმა დირექტორმა ბერნდ რაიხარტმა ვრცლად ისაუბრა პროექტის შესახებ:

"გასულ ოქტომბერში ჩვენ დავიწყეთ ღია დიალოგი ევროპული საკლუბო ფეხბურთის მომავალზე. მას შემდეგ ჩვენ ვესაუბრეთ თითქმის 50 ევროპულ კლუბს და სხვა დაინტერესებულ მხარეს. აბსოლუტური უმრავლესობა იზიარებს შეფასებას, რომ ევროპული ფეხბურთის საფუძველს საფრთხე ემუქრება და დროა შეიცვალოს. ევროპული საკლუბო ფეხბურთი გარდამტეხ მომენტშია. უზარმაზარი დისბალანსი წარმოიშვა მთელ კონტინენტზე და დიდებული ტრადიციების მქონე კლუბები ვეღარ ახერხებენ კონკურენციის გაწევას.

ჩვენმა დისკუსიებმა ნათლად აჩვენა, რომ კლუბებს ხშირად არ შეუძლიათ საჯაროდ ისაუბრონ სისტემის წინააღმდეგ, სადაც სანქციების საფრთხე გამოიყენება ოპოზიციის დასასჯელად. ჩვენი მიზანია წარმოვადგინოთ მდგრადი სპორტული გეგმა ევროპული საკლუბო შეჯიბრებისთვის, რომელიც ხელმისაწვდომი იქნება მინიმუმ ევროკავშირის 27-ვე წევრი ქვეყნისთვის. დღეს წარმოგიდგენთ ჩვენი დიალოგის პირველი ეტაპის წინასწარ შედეგებს, რომელიც იყო გულწრფელი, პირდაპირი და კონსტრუქციული. გაჩნდა მკაფიო დასკვნები ცვლილების აუცილებლობისა და მისი განხორციელების შესახებ. ჩვენ გამოვყავით თანმიმდევრული 10 პრინციპი, რაც საფუძველი უნდა გახდეს მომავალი ევროპული საკლუბო შეჯიბრებისთვის. გასაგებია, რომ ჯერ კიდევ ბევრია გასაკეთებელი და დიალოგი გაგრძელდება. ჩვენ შევდივართ გადამწყვეტ ფაზაში ევროპული საკლუბო ფეხბურთის მომავლისთვის“, - თქვა რაიხარტმა.

შეგახსენებთ, რომ სუპერლიგას მხარს მადრიდის „რეალი“, „ბარსელონა“ და „იუვენტუსი“ უჭერენ. ორი წლის წინ პროექტში 12 კლუბი იყო, თუმცა 9 მათგანმა მალევე უკან დაიხია. ხსენებული სამი კლუბი კი დღემდე სუპერლიგის შექმნის მომხრეა და უკვე აქტიურ მუშაობაზეც გადავიდნენ.