ავტოსპორტი

23:47 | 6.02.2023 | ნანახია [] - ჯერ

„უილიამსმა“ ახალი გაფორმება და სპონსორი წარმოადგინა

„უილიამსმა“ საკუთარ ბაზაზე, ფორმულა 1-ის ახალი სეზონისთვის, თავისი ახალი სარბოლო ავტომობილის, FW45-ის გაფორმება და ახალი სპონსორის წარდგენის ცერმონია გამართა.

ფორმულა 1-ის ერთ-ერთ ყველაზე ტიტულოვან გუნდს, რომელმაც გასული სეზონი ბოლო ადგილზე დაასრულა, ჯერ ახალი შასი არ უჩვენებია. მას პირველად ბაჰრეინის წინასასეზონო ტესტებზე ვიხილავთ.

„უილიამსის“ თავმჯდომარე მეტიუ სავეჯმა განაცხადა, რომ გუნდის ტრანსფორმაცია გრძელდება. ის ამბობს, რომ ახალი ავტომობილით აღფრთოვანებულია და მადლობა გადაუხადა მთელ გუნდს, რომელმაც ის შეიმუშავა და დაამზადა.

გუნდში მთავარი სიახლე, მისი ახალი შეფი - ჯეიმს ვოულზია, ვინც ჯოსტ კაპიტო შეცვალა. ვოულზს გამოცდილება „მერსედესში“ აქვს დაგროვილი, რაც „უილიამსს“ აუცილებლად გამოადგება. ასევე შეიცვალა ტექნიკური დირექტორი ფრანსუა-ქსავიე დემესონი. გუნდი დატოვა კანადელმა პილოტმა ნიკოლას ლატიფიმ, ვის ადგილსაც ამერიკელი ლოგან სერჯენტი დაიკავებს. ეს არის ფ1-ის პირველი ამერიკელი პილოტი 2007 წლის შემდეგ, ვინც სრულ სეზონს ჩაატარებს. ის ტაილანდელი ალექს ალბონის თანაგუნდელი გახდა.

ახალი მანქანის საჭეს პირველად სერჯენტი, 13 თებერვალს მიუჯდება, ვინც სილვერსტოუნზე, ეგრეთ წოდებული ფილმის დღის (სარეკლამო რგოლის დღე) ტესტებში მიიღებს მონაწილეობას.

რაც შეეხება „გალფს“, ნავთობგიგანტი ბოლო წლებში „მაკლარენის“ პარტნიორი იყო, მაგრამ „უილიამსთან“ გადაბარგება გადაწყვიტა. ეს ნიშნავს, რომ მოტორსპორტში პოპულარულ ბრენდში „უილიამსის“ პროგრესის სჯერათ.

0.122905