ტურინის „იუვენტუსის“ მთავარმა მწვრთნელმა მასიმილიანო ალეგრიმ „ლაციოსთან“ იტალიის თასის მატჩის შემდეგ კომენტარი გააკეთა. ის კმაყოფილი დარჩა საკუთარი გუნდის თამაშით და განსაკუთრებით დამოკიდებულება მოეწონა.

„კარგი თამაში იყო და კარგად ვითამაშეთ, „ლაციოს“ ბევრი არაფრის შექმნის საშუალება არ მივეცით. ყველაზე მნიშვნელოვანი დამოკიდებულება იყო, რომელიც „მონცასთან“ საერთოდ არ გვქონდა. ბიჭები პასუხისმგებელი არიან, მათ უნდა გაიგონ, რომ გამარჯვებისთვის ტაქტიკისა და ტექნიკის გარდა, სწორი სულისკვეთებაა საჭირო. ლოკატელი გულით და გონებით თამაშობს, ის სხვებისთვის მნიშვნელოვანი მაგალითი ხდება, აქვს „იუვეს“ დნმ, კიეზამაც კარგად ითამაშა. ახლა „სალერნიტანასთან“ მატჩი გველოდება, რომელიც ჩვენი პირდაპირი კონკურენტია, რადგან ჩვენ 23 ქულა გვაქვს, მათ - 21“, - თქვა ალეგრიმ.

შეგახსენებთ, რომ „იუვენტუსი“ იტალიის თასის ნახევარფინალში „ინტერს“ შეხვდება, მომდევნო მატჩი კი 7 თებერვალს, „სალერნიტანასთან“ ელოდება.