რაგბი

21:00 | 2.02.2023 | ნანახია [] - ჯერ

ხვალ დიდი 10 განახლდება

ბორჯღალოსნების წლის პირველ თამაშამდე ორი დღით ადრე გულშემატკივრებს გასახურებლად შიდა ჩემპიონატის შეხვედრები ელით. საქართველოს 23-ე ჩემპიონატი, დიდი 10 3-4 თებერვალს მე-12 ტურის თამაშებით განახლდება.

კალენდარი ისე დაიგეგმა, რომ შიდა ჩემპიონატის შეხვედრები სანაკრებოსას არ დაემთხვეს. 3 თებერვალს სამი თამაშია, 4-ში კი ორი. 4 თებერვალს ჩატარდება პირველი ლიგის მე-13 ტურის ხუთივე შეხვედრა.

დიდი 10-ის მე-12 ტურის პირველი მატჩი 3 თებერვალს, „რაგბი პლატოზე“ 13 საათზე დაიწყება და მასში ორი უძველესი კლუბი დაუპირისპირდება ერთმანეთს. გასული სეზონის ვიცე-ჩემპიონი ბოლნისის ‘ყოჩები’ საქართველოს ჩემპიონატის ყველაზე ტიტულოვან კლუბს, ‘ლოკომოტივს’ მასპინძლობს.

მიმდინარე სეზონში ბოლნისელებმა 6 შეხვედრა მოიგეს, 5 დათმეს და ჯამში 26 ქულით საფლეიოფო მე-6 პოზიციაზე არიან, თუმცა მას მხოლოდ თითო ქულით ჩამორჩებიან ‘ბათუმი’ და ‘ხვამლი’. ამიტომ, ‘ყოჩებისთვის’ ყველა ქულას გადამწყვეტი მნიშვნელობა აქვს. ‘ლოკომოტივი’ ერთადერთი გუნდია, რომელსაც ჯერ შეხვედრა არ მოუგია და 11 თამაშიდან 3 ქულით ბოლო ადგილზეა, თანაც ისე, რომ ‘აკადემიას’ 18 ქულით ჩამორჩება და დიდ 10-ში დარჩენის მხოლოდ თეორიული შანსი აქვს. პირველ წრეში ‘ყოჩებმა’ 32:18 იმარჯვა, მაგრამ ბონუსი ვერ აიღო.

15 საათზე მიმდინარე გათამაშების ლიდერი ‘ხარები’ ქუთაისის ‘აიას’ რუსთავში მასპინძლობს. ეს შეხვედრა აღდგენილი „სარბიელის სინისთვისაც“ იქნება, რომელსაც რუსთაველები აგერ უკვე 5 თამაშია ფლობენ.

‘ხარებმა’ 11-იდან 9 თამაში მოიგო და 39 ქულით პირველ ადგილზეა. ‘აიას’ 5 მოგების წილ ამდენივე მარცხი და ერთი ფრე აქვს, 27 ქულა მოაგროვა და მე-5 პოზიციაზეა. პირველ წრეში ქუთაისში დიდი ბრძოლა გაიმართა და ‘აიამ’ ლიდერს ორიდან ერთი მარცხი აგემა – 27:26.

დღის ბოლო მატჩში დედაქალაქური დერბია. ‘ლელო-სარასენსი’ ‘აკადემიას’ „დიღომი არენაზე“ 17 საათზე დაუხვდება. ‘ლელო’ 8 მოგებით, ერთი ფრით და 36 ქულით მეორე პოზიციაზეა, ‘აკადემიას’ კი 4 მოგება აქვს და 21 ქულით ბოლოსწინა მე-9 პოზიციას იკავებს. აღსანიშნავია, რომ „მხატვრებმა“ წლის ბოლოს მიჯრით სამი თამაში მოიგეს და საფლეიოფო ექვსეულში მოხვედრის შანსი დაიბრუნეს. 5-თამაშიანი გამარჯვებების სერია აქვს დიდ დიღმელებს. პირველ წრეში ‘ლელომ’ ბონუსის გარეშე, 28:13 მოიგო.

ორი თამაშია 4 თებერვალს. 14 საათზე ‘ხვამლი’ მუხიანში სტეფანწმინდის ‘ყაზბეგს’ მიიღებს. ლიგის დებიუტანტმა ‘ხვამლმა’ დაამტკიცა, რომ ბრძოლისუნარიანი გუნდია და 4 მოგებასთან (3 ბონუსით) ერთად, 7 წაგებულ მატჩში მცირე სხვაობისთვის 6 ნუგეშ ქულა აიღო. შედეგად, ის 25 ქულით მე-8 პოზიციაზეა და ‘ბათუმს’ მხოლოდ დამატებითი მაჩვენებლებით ჩამორჩება. ‘ყაზბეგს’ 29 ქულა (6 მოგება, 5 მარცხი) აქვს და მე-4 ადგილზეა. პირველ წრეში ის ერთადერთი გუნდი იყო, რომელმაც მუხიანელებს ნუგეშ-ქულა არ დაანება და პირიქით, ბონუსი თავად აიღო – 33:13.

ტური ბათუმში დასრულდება. მოქმედი ჩემპიონი ‘ბათუმი’ ქუთაისის ‘არესს’ 16 საათზე მასპინძლობს. ზღვისპირელებმა 5 თამაში მოიგეს, 25 ქულა აქვთ მე-7 ადგილზე არიან. ‘არესი’ 7 მოგებით და 32 ქულით მე-3 საფეხურზეა, თუმცა სატურნირო ცხრილში ისეთი სიმჭიდროვეა, დარჩენილ 7 ტურში ყველა ქულას დიდი მნიშვნელობა ექნება. პირველ წრეში ქუთაისელებმა გადახალისებული შემადგენლობით მოთამაშე მეტოქე ბონუსით, 43:19 დაამარცხეს.

RUGBY.GE

თეგებიდიდი 10
0.110487