„იუვენტუსის“ მთავარმა მწვრთნელმა მასიმილიანო ალეგრიმ „მონცასთან“ მატჩის შემდეგ კომენტარი გააკეთა. როგორც მან თქვა, მისმა ფეხბურთელებმა უნდა გააცნობიერონ, რომ სერია A-ში ადგილის შესანარჩუნებლად ქულების მოპოვებაა საჭირო.

„ასეთი პირველი ტაიმი არასდროს გვქონია და ამან უნდა დაგვაფიქროს, ყველანი უნდა ვიყოთ პასუხისმგებელი თამაშზე, რომელიც ვითამაშეთ. სამ თამაშში მხოლოდ ერთი ქულა ავიღეთ და 10 გოლი გავუშვით, ეს აღარ უნდა განმეორდეს. ყოველთვის ვამბობდი, რომ მოედანზე 38 ქულა გვაქვს, მაგრამ რეალობა ისაა, რომ 23 ქულა გვაქვს და უნდა ვიცოდეთ, როგორი სატურნირო მდგომარეობა გვაქვს, დღეიდან ბიჭებმა ეს უნდა გააცნობიერონ.

მხოლოდ მოედანზე მუშაობაზე უნდა ვიფიქროთ და ვისაც ეს არ შეუძლია, ნორმალურია, რომ გარეთ დარჩება. კარგ გუნდთან წავაგეთ, მაგრამ გაბრაზებული ვარ, რადგან გოლები ძალიან მარტივად გავუშვით, განსაკუთრებით - მეორე. ქულების დაგროვება გვჭირდება, რომ არ გავვარდეთ, ეს არის რეალობა, წინააღმდეგ შემთხვევაში ძალიან ცუდი იქნება“, - თქვა ალეგრიმ.

შეგახსენებთ, რომ „იუვენტუსი“ 23 ქულით მე-13 ადგილზეა. მომდევნო მატჩს „ბებერი ქალბატონი“ იტალიის თასზე „ლაციოსთან“ ჩაატარებს, სერია A-ში კი 7 თებერვალს, „სალერნიტანას“ ესტუმრება.