მადრიდის „რეალის“ მთავარმა მწვრთნელმა კარლო ანჩელოტიმ ესპანეთის სუპერთასზე „ბარსელონასთან“ მატჩის წინ კომენტარი გააკეთა. როგორც მან თქვა, „რეალში“ ტიტულების მოგების შიმშილი არასდროს გაქრება.
„ჩვენთვის ყველა თასი მნიშვნელოვანია. ამ თამაშში ბევრი რამ არის სასწორზე. ყოველდღე ვმუშაობთ, რომ შევინარჩუნოთ შესაბამისი ფორმა, რათა მოვიგოთ განსაკუთრებული მატჩები და ფინალი. ბიჭები მოტივირებული არიან და თავს კარგად გრძნობენ. ისინი ზეწოლას მიჩვეული არიან და დარწმუნებული არიან საკუთარ შესაძლებლობებში.
გვინდა კონკურენტუნარიანი ვიყოთ ყველა ტურნირზე და ყველა მატჩში. ნაბიჯ-ნაბიჯ უნდა ვიაროთ, რომ სეზონის ბოლოს სასურველ მიზნებს მივაღწიოთ. პრესიდან გავიგე, რომ „რეალში“ შარშანდელი წარმატებით კმაყოფილი არიან, ეს სრული სისულელეა, რადგან მადრიდის „რეალში“ ტიტულების შიმშილი არასდროს გაქრება. ამ კლუბში ვერასდროს დაკმაყოფილდები იმით, რაც უკვე მოიგე”, - თქვა ანჩელოტიმ.
შეგახსენებთ, რომ „რეალისა“ და „ბარსელონას“ მატჩი დღეს, თბილისის დროით 23:00 საათზე გაიმართება.
