„კარდიფ სიტის“ ფრანგული „ნანტისთვის“ ავიაკატასტროფაში ტრაგიკულად გარდაცვლილი ემილიანო სალას სატრანსფერო თანხა ჰქონდა გადასახდელი, რომლის ნაწილიც 4 წლის შემდეგ დაფარა.



იმის გამო, რომ „კარდიფს“ „ნანტისთვის“ 15 მილიონი ჰქონდა გადასახდელი, FIFA-სგან სატრანსფერო შეზღუდვა ჰქონდა დაწესებული. ბრიტანული მედიის ინფორმაციით, „კარდიფმა“ ფრანგულ კლუბს 7 მილიონი ჩაურიცხა, რის შემდეგაც უელსში იმედოვნებენ, რომ მსოფლიო ფეხბურთის მმართველი ორგანო მათ ტრანსფერების გაკეთების უფლებას მისცემს.

„კარდიფი“ მიიჩნევდა, რომ სალა მათი ფეხბურთელი ოფიციალურად არ გამხდარა, ამის გამო კი სატრანსფერო თანხის გადახდაზე უარს აცხადებდა.

არგენტინელი ემილიანო სალა 2019 წლის იანვარში გარდაიცვალა. მისი თვითმფრინავი საფრანგეთიდან უელსში მიფრინავდა, როდესაც ავიაკატასტროფაში მოყვა. მაშველებმა ფეხბურთელის ცხედარი 2 კვირის შემდეგ იპოვეს.