„ლივერპულმა“ კოდი გაკპოს ტრანსფერი ოფიციალურად დაადასტურა. 23 წლის ნიდერლანდელმა ფეხბურთელმა სამედიცინო შემოწმება წარმატებით გაიარა და კონტრაქტს ხელი მოაწერა.

გაკპო „ლივერპულს“ 1 იანვრიდან შეუერთდება და „წითლების“ რიგებში 18-ნომრიანი მაისურით ითამაშებს.

„თავს ძალიან კარგად ვგრძნობ და მიხარია აქ ყოფნა. მოუთმენლად ველოდები ვარჯიშის დაწყებას და ამ ფანტასტიკურ კლუბში თამაშს. ვეცდები გუნდს დავეხმარო და ბევრი რაღაცის სწავლა შემიძლია „ლივერპულის“ შესანიშნავი ფეხბურთელებისგან“, - თქვა გაკპომ.

კოდი გაკპო პსვ ეინდჰოვენის აღზრდილია და 2017 წლიდან მთავარ გუნდში 159 მატჩში 55 გოლი გაიტანა. მას ნიდერლანდების ნაკრებში 14 შეხვედრაში 6 გოლი აქვს გატანილი, მათ შორის, 3 გოლი მსოფლიოს ჩემპიონატზე გაიტანა.