დონეცკის ,,შახტარის" სპორტული დირექტორის, დარიო სრნას ინფორმაციით, გუნდი უკრაინელ ამომავალ ვარსკვლავს, მიხაილო მუდრიკს 100 მილიონ ევროდ აფასებს.



მიხაილო მუდრიკმა მიმდინარე სეზონში, ისევე როგორც შიდა ჩემპიონატზე, ასევე ჩემპიონთა ლიგაზეც ,,შახტარის" შემადგენლობაში თავი ძალიან კარგად წარმოაჩინა და ევროპული გრანდების ყურადღებაც მიიქცია. ბაზარზე ყველაზე მეტად ლონდონის ,,არსენალი" აქტიურობს, რომელიც მუდრიკის შეძენას რაც შეიძლება მალე შეეცდება.

The Athletic-თან საუბრისას, ,,შახტარის" სპორტულმა დირექტორმა, დარიო სრნამ განაცხადა, რომ ის კილიან მბაპესა და ვინისიუს ჟუნიორის შემდეგ, მესამე საუკეთესო მარცხენა შემტევია და მის შესაძენად გუნდებს 100 მილიონი ევროს გადახდა მოუწევთ.

მუდრიკის კარგი თამაშის გათვალისწინებით, ივარაუდება, რომ ის დონეცკის ,,შახტარში" დიდხანს აღარ დარჩება და კარიერას სხვა კლუბში გააგრძელებს, მისი ტრანსფერი კი ,,შახტარისთვის" ყველაზე ძვირადღირებული იქნება მას შემდეგ, რაც დმიტრი ჩიგრინსკი ,,ბარსელონაში" გადავიდა.

მიხაილო მუდრიკმა მიმდინარე სეზონში 18 მატჩში მიიღო მონაწილეობა და თავი 10 გოლითა და 8 საგოლე გადაცემით გამოიჩინა.