ესპანური გრანდი, ,,რეალ მადრიდი" დარწმუნებულია, რომ ,,დორტმუნდის" ინგლისელ ფეხბურთელს, ჯუდ ბელინგემს სწორედ ისინი შეიძენენ.



19 წლის ინგლისელი ფეხბურთელი მსოფლიო ჩემპიონატის დაწყებამდეც ევროპული გრანდების მთავარი სამიზნე იყო, წარმატებული მუნდიალის ჩატარების შემდეგ, კი მასზე მოთხოვნა კიდევ უფრო გაიზარდა.

,,რეალ მადრიდი" მზადაა ბელინგემის სანაცვლოდ 115 მილიონი ევრო გადაიხადოს და კარლო ანჩელოტი დარწმუნებულია, რომ ახალგაზრდა ინგლისელი 2023 წელს მის გუნდს შეუერთდება.

,,გალაქტიკოსის" ნახევარდაცვა უკვე დატოვა კაზემირომ, ლუკა მოდრიჩი და ტონი კროოსი კი კარიერის დასასრულს უახლოვდებიან, შედეგად, ,,რეალი" მზადაა, რომ მათ შემცვლელ ნახევარმცველებში დიდი თანხა გაიღოს.

ჯუდ ბელინგემი ,,დორტმუნდს" 2020 წელს, ,,ბირმინგემიდან" შეუერთდა და ფეხბურთელმა გერმანულ კლუბში ჩატარებულ 112 მატჩში 19 გოლის გატანა და 21 საგოლე გადაცემის შესრულება მოახერხა.