კვირას, 18 დეკემბერს, ქალაქ ლუსაილში, ყატარის მსოფლიო ჩემპიონატის ფინალური მატჩი გაიმართება. არგენტინის ნაკრები საფრანგეთისას დაუპირისპირდება. თამაში თბილისის დროით 19 საათზე დაიწყება.
საფრანგეთის პრეზიდენტმა, ემანუელ მაკრონმა, რომელიც ფინალს დაესწრება, ეროვნული გუნდის ტრავმირებული შემტევი, კარიმ ბენზემა დაპატიჟა მატჩზე, მაგრამ „რეალის“ ლიდერმა შეხვედრის მადრიდში ცქერა არჩია - წერს ტვიტერში ჟურნალისტი ალფრედო პედულა.
ფრანგულ მედიაში გაიჟღერა ინფორმაციამ, თითქოს „ოქრის ბურთის“ წლევანდელი გამარჯვებული გამოჯანმრთელდა და შეიძლება ფინალშიც ეთამაშა. ამ ინფორმაციამ „სამფეროვანთა“ დამრიგებელი, დიდიე დეშამი ერთობ გააბრაზა - გადაუმოწმებელ ამბებს რატომ ავრცელებთო.
რაკი ბენზემა არ მიდის, მაკრონმა მატჩზე ნაკრების სხვა ტრავმირებული ფეხბურთელები დაპატიჟა. ფინალს საპატიო სტუმრების სტატუსით პრესნელ კიმპემბე, ნგოლო კანტე და პოლ პოგბა დაესწრებიან.
